وااااااجب كلاكيت تاني مره

بما أني أنهيت مراحلي الدراسيه

وأرتحت من الواجبات المدرسيه

لكن هيهات أن تنتهي الواجبات

ورايا ورايا

أووووم أييييه ربنا بعتلي اللي يبعتلي واجبات تاني

أووووم لقيت الواجبات كترت علي

فكان لابد وحتما من الإسراع في الحل حسب ورودها أولا بأول

والحمد لله لقيت أول واجبين زي بعضهم بالمللي

فأبتسمت إبتسامه ماكره وقلت لنفسي

فرصه حل الواجبين مره واحده وبكده تأخد الدرجه مضاعفه

واللي بعتتلي الواجب الأولاني المدونه أسماء أختكم في الله صاحبة مدونة أجمل أيامنا

وبعتتلي الواجب التاني المدونه أسماء الشيخ صاحبة مدونة كلام وخلاص

وبما أنهم أسماءتان فطلع الواجب متشابه كتشابه الأسم

وهما أختان عزيزتان وواجبهم عالعين والراس فلابد من الحل

هييييييييه إستعنا على الشقا بالله نبتدي

أعطيتك 3 وردات لمن تهدي الوردات اللي معك ؟

واحده لأبي والتانيه لأمي والتالته حخليها لواحده لسه معرفتهاش

لو أعطيتك ورقه بيها 3سطور وقلت لك أكتب فيهم اللي إنت عايزه

حتكتب ايه ؟

حكتب إسمي

وعنواني

ورقم تليفوني

هههههههههههههههههههههههههههههههه

ما هو هدفك في الحياه ؟

يقول ربنا (وما خلقت الجن والإنس إلا ليعبدون )

فأسمى هدف هو أن أكون عند الله من المخلصين

وثانيا ان يوفقني الله ويرزقني بالذريه الصالحه

وأوفق في أن أجعل منهم شباب نافع لبلده وأمته

(حلو كده )

إن شاء الله بكره احلى من النهارده

هل تصدق هذه المقوله ولماذا ؟

في العموم أنا مؤمن بتلك المقوله فهي الأمل التي يحيا به الإنسان

وبدون الأمل في بكره يحكم الشخص علي نفسه بالموت

حتي وإن كان بين الناس من الأحياء

والمؤمن يجب أن يكون دائما حسن الظن بالله

فعلينا أن نجتهد للتغيير للأفضل ونتوكل علي الله

ومن ثم نسلم أمورنا لملك الكون فهو لن يضيع أجر من أحسن عملا

ما هي أجمل مقوله سمعتها في حياتك ؟

كن كالنخيل عن الأحقاد مرتفعا

يرمى بحجر فيلقي بأطيب الثمر

من المغني اللي بتحبه أوي ؟

كتير مش واحد

أم كلثوم , عبد الحليم , محمد عبده ........ ألخ

وأيه أحلى أغنيه بتحبها ؟

برضو كتير لكن حختار القلب يعشق كل جميل لأم كلثوم

غزه تمثل لك أيه ؟

تمثل رمز كرامة أمتنا المفقوده

وهوان أمرنا علي عدونا

أعطي لأنتمائك لوطنك درجه من مائه

150%

بلدي وإن جارت علي عزيزة

وأهلي وإن ضنوا علي كرام

لو تزوجت وأنجبت ولدين وبنتين أي الأسماء تختار لهم ؟

الولدان حمزه و سيف

والبنتين حخلي أمهم تسميهم بس بشرط لازم تعجبني الأسماء

وإلا لما أروح اكتبهم حكتب أللي على مزاجي ههههههههه

(قمة الديموقراطيه )

عمرك غشيت في إمتحان وإنت صغير ؟

طبعا متوقعين أجاوب واقول لا أبدا ومستحيل ومش ممكن

لكن لأ ده انا وبلا فخر كنت بدرس

كيف تغش والمراقب امامك دون ان يلحظك

كنت ببدع في اساليب البرشام ههههههههههههههه

لدرجة إني مره إتقفشت والمراقب فتشني ذاتيا ودور حوالي

ومعرفش أنا مخبي الورقه فين

بس هو ملاحظش إني كنت داهن سطح التخته من جوه بقطعة موز

بحيث تلزق الورقه بمجرد ما أحطها وطبعا متوقعش يدور في سطح الدرج

وسابني بعد ما شعر أنه ظلمني ههههههههههههههههه

بصراحه كنا عفاريت أيام الدراسه ,

كان همنا إزاي نبتكر ونتحايل علشان نخلص وننجح هههههه

لو إتعرضت عليك رشوه وإنت في زنقه ماليه حتعمل أيه ؟

أولا أدعو الله أن لا يوقعني في مثل تلك الزنقات

ثانيا لو مش لاقي آكل مش مجرد زنقه لن أقبل أقل القليل من المال الحرام

فكل لحم نبت من حرام فالنار أولى به

حمانا الله وجميع المسلمين من الرزق الحرام

قول 3 صفات ب3كلمات توصف بيهم شخصيتك

من الصعب أن الواحد يوصف نفسه

فإسمحيلي أعتذر عن إجابة هذا السؤال

برضو وبكلمه واحده أيه أهم صفه عايزها في شريك حياتك ؟

متدينه والباقي مقدور عليه

أيه المجال اللي غير دراستك وشايف نفسك فيه أوي؟

أنا كان نفسي أدخل الكليه الجويه

وفعلا قدمت بس محصلش نصيب

بتحب السفر ؟

جدا وخصيصا باليالي القمريه

وأشغل محمد عبده ليلة خميس طرز بها نور القمر شط البحر

نصف الشهر والليل من فرحو عريس لييييلة خميس

دلوقتي حالا أيه المكان اللي نفسك تكون فيه ؟

مكه المكرمه أو المدينة المنوره

تمرر التاج ده لمين ؟

أنا نفسي أمرره لكل حبايبي وأصدقائي المدونين

بس بلاش لحسن حد يدعي علي

الحمد لله خلاااااااص حليت الواجب

أما أقوم ألعب شويه

سلااااااااام