الأحد، 21 سبتمبر 2008

تاااااااااااااااااااااااااج 5 في 1


السلاااااام عليكم



التاج هو هو الواجب



وطبعا لآزم أحل الواجب علشان أعمال السنه

بس الأسئله صعبه , فيارب يارب أنجح



وصلني هذا التاج أولا من كيارا أخصائية التاريخ القديم والحديث

صاحبة مدونة ضي القمر


وثانيا من الدكتوره مروه طبيبة الأطفال والحوادث والقيئ الدموي

صاحبة مدونة فتح يابني فتح


وثالثا من الكتوره البيطريه الكبيره يعنى متخافوش من الإنفلونزا

صاحبة مدونة طوبه فضه وطوبه ذهب

ورابعا من صاحب القهوه يعني الشيشه والروقان إسلام
صاحب مدونة قهوة نام يا مصري

وخامسا من الدكتوره بتاعت السياسه والإقتصاد يعنى البلد في إيد أمينه

مها زين صاحبة مدونة إنها الحياه


نبدأ في حل التاج والله المعين

بالنجاح والتوفيق يابو حميد اللي هو أنا


بدأت تدون من إمتى ؟ ودخلت العالم ده إزاي ؟

انا بدأت التدوين من فتره بسيطه جدا لا تتعدى الأربعة أشهر

وبالتحديد يوم 8/6/2008 ولكني قبل هذا التاريخ بنحو شهرين
كنت بدخل المدونات أعلق بدون أن يكون لي مدونه خاصه

وإزاي عن طريق الشات وخصوصا شات مصراوي

فقد تعرفت على صبرني يا رب ودعتني لزيارة مدونتها
رغي إمرأه غير مطحونه فزرت مدونتها
ومن هنا كانت البدايه


أيه كان إنطباعك في البدايه ؟

كنت بصراحه مستغرب الأمر لأنه رغم تعاملي الطويل مع النت

ولكني لم أصادف مدونات قبل ذلك

ولكن مع الفتره تعرفت على هذا العالم وكونت علاقات

عن طريق زوار مدونة صبرني يا رب وزوارهم

ولكني كنت متوجس من إنشاء مدونه خاصه , حتى أتعرف أكثر على

تقنية إنشاء المدونات وتنسيقها

والحمد لله أخذت الأمور وقتها الطبيعي حتى أنشأت تلك المدونه الناشئه


من أكثر شخص بتهتم بتعليقه على بوستك الجديد ؟

الجواب التقليدي

أنا بهتم بكل من شرفني بالزياره والتعليق

وأرى في تعليقه إضافه لي

حتى المعارضين أحترم رأيهم وأتقبله

ولكني أرفض المعلقين الذين يجرحون في زواري بدون وجه حق


ما هي أهم شيئ تعلمته من عالم التدوين ؟

أهم حاجه الصبر

فأنا ممكن أقعد على النت بالساعات بدون أن أشعر

وقبل كده مكنتش أعرف أقعد على بعضي ساعه كامله ههههههه

وإستفدت طبعا بكثير من الخبرات والتجارب للمدونين

والمعلومات القيمه التي يكتبها المدونين


ما هو أكثر شيئ كرهته في عالم التدوين ؟

إنتشار بعض المدونات الشاذه والملحده بشكل لافت للنظر

وإسائة البعض وخصوصا المسلمين لديننا الحنيف

ولأصول وقواعد الدين الإسلامي كالحجاب مثلا الذي

يتعرض لحملة عنيفه من أشخاص أقل ما يمكن وصفهم به الجهل


هل تشعر أن التدوين له تأثير؟

قد لا يكون له التأثير الكبير حاليا

لكن بإذن الله مع مرور الزمن سيكون له تأثير كبير

وخصوصا مع إنتشار أجهزة الحاسوب في كل بيت


تهدي التاج ده لمين ؟

أدبس مين أدبس مين

كويس لم يتم تحديد عدد معين فأنا حأهديه لبعض أصدقائي

وأتمنى ميكسفونيش ويجاوبوه

1- إيهاب شاب شنكوتي

2-على محمد صور وتصورات

3-بسام الكثيري بيادر العمر


5-خلود الجهني ضوء




كفايه كده المره دي وفي تاج تاني أبقى أدبس فيه ناس تاني هههه


وأقولكم سلااااااام

علشان أروح ألحق التراويح


هناك 34 تعليقًا:

كيارا يقول...

اول تعليق

اششششششششششششطه

كيارا يقول...

ايه الاجابات الجامده دي


لالالالالالالالالالا ميتخافش عليك

في تاجين عندي تانين هحلهم

وطبعا هتوصي بيك

كيكيكييكيكيك

kochia يقول...

اجابات لطيفة ومتوازنة جدا

تحياتي

أختكم فى الله يقول...

اجابات هايلة بجد

ربنا يبارك فيك

فى عندى تاج فى المدونة

ياريت تاخده تحله لو سمحت

mero-moory يقول...

السلام عليكم ورحمة الله وبركاته

أنا كيت اهو ايه ده ايه ده انا لسه زاخده التاج ده وحليته الحمد لله جت اوت منك يا أحمد موث هتعرف تدبثني هههههههههههههههههه انا اللي هدبسك قريبا بقى ( ايموشن بيطلع لسانه ) هههههه

يلا خيرها في غيرها

بس بجد اجاباتك ما شاء الله جميلة اوي ربنا يحفظك ويكرمك يارب
منتظرة اقرا بقية واجباتك

وهكمل قراءه في باقي موضوعاتك عشان أقراها كلها ان شاء الله

في رعايه الله

saso يقول...

جميل يا استاذ احمد ....

تمنياتى ليك بالتوفيق دايما

بسّام الكثيري يقول...

أخي الودود / أحمد

كذا انت دبستني ! :)
أول مرة بحل واجب .. يالا عشانك راح احل ذا الواجب .
تحيتي و تقديري .. في أمان الله .

maha zein يقول...

كده يبقه انت كشفت نفسك
كشفت انك مقرتش البوست اللى بعد البوست بتاع الاعتذار
لانه كان عبارة عن تاج انا حلاه لا وايه كمان
ده انا اهدتلك التاج ده
شفت الصدف بقه

طوبة ذهب وطوبة فضة يقول...

اجابات جميله بجد بس انت واخد سبعين فى الميه لحد ما تكمل باقى الاجابات ساعتها تاخد باقى الميه يعنى ناجح مبروك تحياتى

nona يقول...

الف مبروك على التاج
بس طلعت شاطر و حليت الواجب تمام
و مبروك على الاى اخدوا االواجب

رئيس جمهوريه نفسى يقول...

انا اسمى مش مكتوب الحمد للة
اجباتك لذيذة بس حختلف معاك انى التدوين حاليا لية دور واثر كمان على الاقل في خدمة المجتمع خصوصا بعد الحملات الخيرية اللى بيعملها المدونين موضوع تغير الواقع دة الخطوة القادمة ان شاء اللة

صبرني يارب يقول...

شكرا على التدبيس يا استاذنا
قصدي التاج

رغم انى باحب اقراا لتيجان اوي بس ما باخاف اجاوب عليهم

وعلى فكره احنا اتقابلنا فى شات مصراوي
واعتز وافتخر بانى انا كنت بوابة التدوين لحضرتك

واتفضلوا معانا بقى على التاج بتاعي

د/مروة المعداوى...........هات التمساحه يالــــــــــــــــــه يقول...

هالوووووووووو

و انا ايش اكون يا باشا عشان اديك درجات
انت ميه ميه من غير حاجه

اجاباتك بسيطه و ديبلوماسيه جدا
عجبنى ازاى بدات التدوين و انك اخدت فترة تفكر
واضح انك عقلانى

انا عاده مش بفكر اللى بيطق فى دماغى بعمله...خصوصا لو كان حاجه لذيذه و مغامره

اما القعده قدام النت هى الحاجه اللى بتصبرنى لان عاده البيت لما برجعه بيكون اللى فى البيت يا نايميين يا فى شغلهم لما بصحى

شكرا على ردك على التاج
و جارى التدبيس فى واحد تانى
نيها هاهاهاها

تشااااااااووووووووووو

ضى القمر يقول...

الحمد لله اسمى مش موجود .. ولا معروف أصلا بمدونتك ..هههه

لكن بجد بوست جميل جدا بما احتواه من اجابات .

اجمل تحيه لك ..
واتمنى التوفيق لكل اللى اختارتهم .. ( كأنهم فى امتحانات ثانويه عامه . ههههههه )
كل التقدير لك

3ali يقول...

yatakabal alah
:)

nice effort in your blog man

بنت سيناء.. يقول...

فى امثلة هذة المواضيع وهى الرد على اسئلة او تاج الواحد ما بيعرف ايش يعلق ويقول؟؟


لانها اجابات عن امور شخصية وليست عامة ومطروحة للنقاش


الست معى؟

نهر الحب يقول...

ماشاء الله عليك
اية يابنى 16 تعليق فى ثوانى ههههه
انا مش بحسد انا بقررررررر
بجد ربنا يوقك دليل انك شخصية طيبة ومحترمة جداا انك استطعت ان تثبت وجودك فى العالم التدوينى فى فترة بسيطة
وتمكنت من ان يكون لك اسم ومدونة معروفة بين المدونين والكل يحترمك ويحترم
وجهة نظرك
تحياتى لك احمد
وبالتوفيق يارب

tote يقول...

السلام عليكم
برافو انت حليت الواجب كله صح هههههههههه فعلا اجابات مرضية وسليمة وعندك حق فيها
رمضان كريم

شيماء طلعت يقول...

اول زيارة لى بمدونتك لكنها أعجبتنى بحق

اجابات الاسئلة جميلة جدا

تعليقاتك التى قراتها عدة مرات بكثير من المدونات تدل بحق على شخصية محترمة

دمت بخير

همس يقول...

ماشاء الله

سريع فى الاجابه

وسريع فى انك تكتب اسمى

دا تانى مره يتجالى

التاج دا

حاضر ياسيدى من عنيا

هنحلو

مبسوط كدا

Sarora_S.K يقول...

اهلا احمد،
شن هالاجابات الحلوة هذه، بس على فكرة انا نشترك معاك اني ممكن نقعد عالنت كم ساعة بدون مانحس بس للأسف اهلي هما اللي يحسوا...
سلام

عاشقة القمر يقول...

كل عام انت بخير تقبل الله مننا ومنكم اجات رائعه وجميب ومتناسق وجامد ربنا يكرمك

مواطن مصرى نايم يقول...

على فكرة
انا كنت عامل لك اهداء للتاج ده برضوا
فالبوست اللى قبل قبل اللى فات

اجاباتك جميلة يا ابوحميد
تحياتى ليك

اسلام

الريم يقول...

ماشى ياحمد مردودلك ولا جبت سيرتى فى اى حاجة

اشكرك اشكرك اشكرك

قطرات من شواطئ الحياة يقول...

أحمد كي

بصدق رااااااااائع !!!!

ahmed_k يقول...

كيارا


أهلااااااااا بكيارا
ربنا يخليكي على تواجدك أول
وتاني تعليق وكلامك الجميل
ولالا بلاش تاجات تاني
أخلص اللي معايا وبعدين ربنا يسهل

تقبلي خالص تحياتي
***********************************************
kochia


ربنا يبارك فيكي
أشكرك على مرورك اللطيف

تقبلي تحياتي
**********************************************
أختكم في الله


منوره يا أسماء
وحاضر بس ممكن لو أمكن أحل الواجب اللي عندي لسه محلتهوش
وليكي علي أحله بعد كده عشان بحلهم بترتيب ورودهم لي
وشكرا جزيلا وحروح أشوف إجابتك أيه عليه

تقبلي تحياتي
**********************************************
mero-moory


يا باشا تنور المدونه كلها
وربنا يقدرني وأدبسك في واجب أييييييه
حاجه سقع كده
فلت المرادي بإعجوبه معلش تتعوض ههههه

تقبلي تحياتي
*********************************************
saso


يارب يخليكي يا ساسو نورتي

دمتي بخير

ahmed_k يقول...

بسام الكثيري


ولسه يا غالي ربنا يقدرني في تاج
لسه مبعوتلي طازه ححله وبالتأكيد لك فيه نصيب , مش التاج الجاي اللي بعده
خليك مستعد ههههههههههه

دمت بخير
**********************************************
maha zein


يا كسوووووووووووفي
كده يا مها ولا تقوليلي
معلش معرفتش أدبسك
و حعمل تعديل على البوست أضيفك فيمن أرسلوا التاج وليس من مرسل لهم
كده تمام صافي يالبن ههههههههه

تقبلي تحياتي
***********************************************
طوبه ذهب وطوبه فضه


أشكرك يا دوك
ولو أني عرفت بالتاج بالصدفه
مش كان المفروض تديني خبر لكن لحقت نفسي
ههههههه
نورتي يا دوك

تقبلي تحياتي
***********************************************
nona


أهلا بكي يا نونا في أولى زياراتك هنا
كنت بشوف تعليقاتك في مدونات تانيه
ولمست فيكي ذوق عالي
منوره يا أختي الكريمه

ودمتي بخير
**********************************************
رئيس جمهورية نفسي


أهلااااااااااا بحوده بلدياتي
منور يا متر في أول زياره ليك هنا
وحضرتك مبعوتلك التاج ده مثلي تمام من د/مروه المعداوي
وبالنسبه لأثر التدوين أتفق معاك لكن التأثير الحالي بين المدونين أنفسهم
لكني أود أن يأتي اليوم اللي تصبح فيه المدونات مطلوبه من جميع فئات الشعب سواء مدونين أو غير مدونين
أشكر لك تواجدك وإثرائك للحوار

تقبل تحياتي وكرر الزياره
************************************************
صبرني يا رب


يا أم مريم حضرتك بتسعديني جدا بتواصلك ومرورك بارك الله فيكي
وحاضر حعمل تعديل في إسم الشات
وشفت حللك الجميل وكلماتك الجميله

تقبلي تحياتي

ahmed_k يقول...

د/مروه المعداوي


يارب يسعدك كما أسعدتيني بكلماتك الجميله يا دوك
والحمد لله أن إجابتي نالت إستحسانك
وبلاش يا مروه تاجات تاني أنا لسه في 2تاج لسه محلتهمش أصلي بأخذهم بترتيب الورود لي
مرورك جميل دايما يا مرمر

تقبلي تحياتي
***********************************************
ضي القمر


ياباشا إسم حضرتك بينور مدونتي جدا
يكفي أنك ضي القمر وحد يقدر يستغنى عن القمر وضوءه
وإنتظري مني تدبيسه قريبا في التاج القادم ههههههههههه

تقبلي تحياتي
*********************************************
منور يا محمد
وتقبل الله منا ومنكم صالح الأعمال
ويا عم محمد الحروف العربي أحلى من الإفرنجي ههههههههههه
أنا كنت زعلان منك تأيدك لآدم لكن بطلتك هنا تحول الزعل لسرور بتواجدك

تقبل تحياتي
**********************************************
بنت سيناء


يا أختي مرورك يكفينا شرفا وسعاده
أهلا وسهلا بكي دوما

دمتي بخير
***********************************************
نهر الحب


ههههههههه ياباشا أيش نيجي جمبك
انا مش بحسد أنا اللي بقر أهه
ربنا يبارك فيكي يا إيناس على تلك
الكلمات الجمله
أخجلتم تواضعنا
مرورك دوما يسعد الفؤاد

تقبلي تحياتي
**********************************************

ahmed_k يقول...

tote


ربنا يبارك فيكي يا توتي
أسعدني مرورك وكلماتك الجميله

دمتي بخير
**********************************************
شيماء طلعت


أهلا بكي يا شيماء في أولى زياراتك هنا
وإن شاء الله تكرري الزياره دوما
وأشكرك جدا على كلماتك وطللتك الجميله
بارك الله فيكي

دمتي بخير
*************************************************
همس


إزيك يا مفروسه هههههههههههه
وسريع أيه التاج ده مبعوتلي من شهر
ومنتظر أشوف إجابتك

تقبلي تحياتي
*************************************************
sarora_s.k


ههههههههه ربنا يصبرهم
أصل النت ده ممكن يتحول لإدمان ههههه
منوره مدونتي المتواضعه
وسلامي لكل الأشقاء في ليبيا

دمتي بخير
************************************************
عاشقة القمر


وحضرتك بالصحه والسلامه
ربنا يبارك فيكي على المرور وكلماتك الجميله
وتحياتي لكل أهل السودان الشقيق

تقبلي تحياتي

ahmed_k يقول...

مواطن مصري نائم


ياباشا هديتك مقبوله وسيتم عمل تعديل في البوست وإضافة إهدائك للتاج
أشكرك يا صديقي جدا
ومردودالك بإذن الله ههههههههه
والحمد لله أن إجابني نالت إستحسانك
بارك الله فيك

دمت بخير
**********************************************
الريم


والله إنتي مكتوب إسمك في المهدى لهم التاج القادم لأنه أسمن وأكبر ههههههههههههه
بس إوعي تدعي علي
منوره دايما يا ريم

دمتي بخير
***********************************************
قطرات من شواطئ الحياه


منوره يا كريمان
ومستني العيديه ملكيش حجه
أهو العيد عالأبواب هههههههههه

تقبلي تحياتي

جنّي يقول...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

ahmed_k يقول...

جني


وعليكم السلام ورحمة الله
تقبل الله منا ومنكم صلاتنا وقيامنا
ونفعنا وإياكم بشهر الخير

بارك الله فيك
دمت بكل خير

خُلود الجُهني يقول...

ماشاء الله يا أحمد إيه الجمال دهـ
طيب يا أخوي الصبر جميل وحجاوب على الأسئله
على فكرة أنا بتقن اللهجه المصريه جداً
شكرا يا طيب

ahmed_k يقول...

خلود الجهني


منوره يا خلود
ورايح أشوف إجابتك للتاج


دمتي بكل خير