الخميس، 12 يونيو 2008

ندم

الموقف ده حصللي من حوالي 16 سنه كنت ماشي في الشارع ومستعجل اوي اوي اوي وقابلني راجل كبير في السن وقاللي يا ابني خد بايدي عديني الشارع وكان طريقه في اتجاه عكس طريقي فقلتله معلش يا عمي انا مستعجل اوي فاعذرني مشيت بس خطوات بعد مقلتله كده ووقفت مره واحده وحسيت بندم شديد علي ردي عليه وعدم مساعدتي له مهما كان الوضع ومهما كنت مستعجل وبصيت بسرعه لورا علشان ارجعله تاني واعديه الشارع فوجدت شخص تاني ماسك ايده وبيساعده بصراحه عيني دمعت وحسيت بوخذة ندم علشان ملحقتهوش وان غيري نال هذا الشرف وبقيت كل يوم ارجع لنفس المكان وفي اوقات مختلفه أقف بالساعه يمكن القاه وآخد بايده وأطلب منه انه يسامحني عللي حصل مني ولكن بدون فايده مقابلتوش تاني ورغم مرور كل تلك السنين علي الواقعه دي منسيتهاش ومش قادر اسامح نفسي علي الموقف ده ودعيت ربنا كتييييييييييير انه يسامحني ويغفرلي هذا الذنب ولكني مش قادر انساه ويمكن قابلتني مواقف زي كده كتير بعد كده ولم اتاخر في المساعده والحمد لله بس مش فاكرهم لكن الموقف اللي حصللي من 16 سنه ده مش قادر انساه ولا يتمسح من ذاكرني وبدعي ربنا كتير اني مكونش في وضع هذا الرجل وملقاش اللي يساعدني عندما يكبر سني , فيا أحبائي لا تضيعوا ابدا فرصه ممكن تقدموا فيها معروف أو مساعده لأي شخص علشان الدنيا سلف ودين وعلشان تنالوا رضا الله عليكم وتذكروا ان من زرع خيرا حصد خيرا ومن زرع شرا حصد شرا ........... ولنا لقاء قادم بأذن الله والسلام عليكم ورحمة الله

هناك 12 تعليقًا:

ورود و أشواك يقول...

إحساسك جميل يا احمد
و حلو اوى اننا نرجع و نندم على خطأ عملناه
الغلط فى حد ذاته مش عيب لكن العيب اننا نصر عليه و ضميرنا ميصحاش و نندم
و مع ذلك متفقدش الامل انك تقابل و يا رب كلنا نتعلم من الموقف ده

كل تقديرى ليك ...

ahmed_k_73 يقول...

ورود واشواك نورتي مدونتي الجديده وفعلا الأحساس بالندم علي الخطأ افضل بكتييييير من الأصرار عليه بس في اخطاء بنخاف ان يكون الرد عليها ان ننحط في نفس الموقف ومنلقاش اللي ياخد بايدنا , والموقف ده حصللي من 16 سنه ومفتكرش اني ممكن اقابله تاني علي كل حال نورتيني وزوريني دائما وتقبلي تحياتي

(احمد سكر ) يقول...

احساس الندم

جميل جدا بس نحسه واحنا موقننين اننا مش هنغلط الغلط دا تانى

تحياتى اخى الفاضل

اخيك
احمد سكر

ahmed_k_73 يقول...

يادي الهنا الباشمهندس هنا والله منورني ومعاك حق حتي التوبه لا تكون نصوحه الا اذا اقترنت بنية عدم العوده لنفس الذنب مره تانيه , شكرا ليك ونورني دايما

فاتيما يقول...

بص يا احمد
البنى آدم عارف الصح و الغلط فين
بس بيطنش لعدة إعتبارات
لكن بييجى عليه وقت و يفوق
فيه حد لازم يتصدم عشان يفوق
ياخد قلم و لا يتضحك عليه و لا يخسر شىء عزيز عليه
عشان يتعلم ميعملش الغلطة دى تانى
إنت جاتلك فرصة دهبية تصلح العيب دا بدرى بدرى يعنى بقالك 16 سنة يا بنى
أحمد ربنا يا احمد
فيه ناس ممكن متلحقشى تصحح الخطأ
و فيه ناس بتقضى العمر فى محاولات و متنجحش
و فيه ناس مبتتعلمشى أبداً
تحياتى و سؤال سخيف كدا معلش إنت عندك كام سنة لأنى حاسة إنك قدنا كدا فى التلاتينات لو أصغر يبقى هايل قوى لأن تفكيرك أنضج من سنك كتير
سلام

ahmed_k يقول...

فاتيما ____اولا منوره المدونه المتواضعه وثانيا انا الموقف ده كله حصل من زمان تقريبا من16 سنه زي ما قلت وحاولت في وقتها تصحيح ما بدر مني لكن بدون جدوي ولا أملك سوي ان يغفر الله لي واللي حصللي انا كاتبه علشان نستفيد كلنا من التجربه دي زي ما انا بستفيد من تجارب كل المدونين اللي بيحكوها والموضوع ده حصل اثناء دراستي الجامعيه بالقاهرهوانا حاليا رجعت للغردقه بلدي وعايش فيها وكنت مستعجل لأني كان يوم امتحان وكانت اللجنه علي وشك البدايه ورغم ان استعجالي كان له ما يبرره وهو الأختبار في نهاية العام الدراسي الا اني لم اسامح نفسي وصورة ذلك الرجل ما زالت مطبوعه في ذاكرتي , وانا يا ستي من مواليد عام النصر 73 يعني من دوركم برضو ههههههههههههه وانتي تسالي زي مانتي عايزه وعموما شرفتيني وكرري الزياره واهلا بيكي دايما

أليس في بلاد العجائب يقول...

السلام عليكم :)
انا مقريتش الا دي بس هكمل الباقي ان شاء الله

الكلام وجعني اوي بجد علشان عيشت حجات دي زي وعارفة كويس الوجع اللي حسيت بيه لما التفت لقيته اتمدت له يد مساعدة غير ايدك

ساعات ابقي ماشية ف الشارع وفي طوبة مثلا ولا فرع شجرة واعدي من جنبه واقول مهو مركون اهو بردة مش ف وسط الطريق يعني مش هياذي حد
وامشي شوية و ضميري يأنبني اوي ارجع تاني و اشيله علي جنب اكتر بس ساعات بمشي و يفضل جوايا احساس وحش اوي اني غلطانة اني معملتش كده

بحسه خير ربنا بيبعته للانسان لعله يغتنم الفرصة و يظفر بالثواب

ربنا يرزقنا فعل الخيرات ويتقبلها مناويتوب علينا جميعا:)

ahmed_k يقول...

اليس سعدت جدا بزيارتك ويا رب دايما تسعديني بآرائك والأحساس بالندم علي فعل خاطئ نعمه كبيره من الله علي عكس التمادي في الخطأ فهو نقمه ------ وبجد نورتيني وأهلا بكي دوما

مجرد خواطر يقول...

فكرتن بموقف حصل لى وانا فى 3 او 4 ابتدائى وكان معانا فى الفصل بنت تعبانة ذهنيا وكانت بتتمنى تقعد جنبى والمدرسة قررت تنقلنى من مكانى وتقعدنى جنبها عشان ترضيها بس انا كنت صغيرة اوى ومش فاهمة فلما رحت قعدت جنبها شميت منها رائحة دواء هى بتاخده فقلت لها ايه الرائحة دى قالت لى رائحة الدواء قلتلها مش عوزة اشمها لحسن اقوم من جنبك ومن يومها رفضت تاخذ الدواء وانا كل ما افتكر ابكى زى دلوقتى كدة اى الذنبين اكبر يا اخى ؟ ربنا يسامحنا كلنا ويغفر لى ذنبى ويا رب البنت دى تكون بالف صحة وأخاف جدا من"اعمل ما شئت فكما تدين تدان" ربنا رحيم

ahmed_k يقول...

مجرد خواطر ----- تشريفك المدونه اسعدني جدا وقصتك اثرت في كثيرا ولكني اقول لكي ان الله رحمته وسعت كل شيئ وبالتأكيد عدم تعاطيها الدواء كان وقت الدراسه بس واهلها مش ممكن يتركوها بدون متابعه وان شاء الله تكون بصحه وخير ويكفي شعورك الذي يدل علي قلب كبير , ربنا يسعد ايامك وأسعدينا بمرورك دوما تحياتي

nonni يقول...

اممممممم حقيقى فكرتنى بموقف حصلى قبل كده بس كان حقيقى عصب عنى حصل كنت ركبت ميكروباص و ست عجوزة كانت شايلة شنطة تقيلة و مش عارفة تتطلع بيها المهم شنطة انا كمان مش هقدر اشيلها ابدا بس الست مش فاهمة حاجة زى دى فضلت الست بصالى انا قولتلها اسفة مش هقدر اشيلهابس بعد ما قولتلها كده بصتلى بصة وحشة اوى زى ما نكون انا مش عاوزة اساعدها
ضميرى انبنى كتير بس بحاول مفتكرش الموقف ده كتير
بالنسبة لموقفك فاحسن حاجة انك ندمت يعنى حسيت بخطئك و دى اهم حاجة علشان متكررهاش تاى
بعتذر على الاطالة
"تحياتى"

ahmed_k يقول...

nonni
اهلا بيكي ونورتي المدونه
وكل شخص ممكن يقابله مواقف زي دي في الحياه
بس لازم نتعلم منها ونحاول ان نصلح من انفسنا
شكرا لمرورك ومنتظر تشريفك دوما
تقبلي تحياتي