الثلاثاء، 23 يونيو، 2009

والله وعملوها الرجاله

آه طبعا عملوها الرجاله

هو الرجاله تفوز وبس؟ لأ الرجاله ممكن تتغلب وتاخد بالتلاته كمان

أنا بصراحه في البدايه أعتقدت أن المنتخب المصري متنكر في زي منتخب أمريكا

وأحنا اللي عمالين نجيب أهداف بس بالمتداري عشان الحسد

بس طلع ظني مش في محله

وطلعوا رجالتنا اللي فرحنا بيهم وطلعنا بيهم السما بعد مباراة إيطاليا هما اللي بيتغلبوا,

هيييييييييييه هم يضحك وهم يبكي,

أنا مش مصدق الماتش واللي شفته فيه

بالتأكيد الفريق ده بل مستحيل يكون نفسه من لعب أمام البرازيل وإيطاليا

ففي لقاء أمريكا شاهدت فريق هزيل لا يسيطر على كره ولا متجانس

ولا فيه روح وعزيمة إنتصار

حتى شحاته كان على غير العاده اعصابه بارده رغم الخساره
ولم ينفعل كإنفعاله وهو منتصر

لدرجة أنني تخيلت أن الماتش متباع لأمريكا

وأن الهزيمه هزيمه سياسيه يعني بأوامر من فوق ,

أنا مستغرب بالفعل من المستوى والروح التي سادت مباراة أمريكا

وهل هذا أداء فريق على أعتاب نقله تاريخيه للاعبيه

ويتحمل مسئولية أمام شعبه وبلده لأنه يمثلهم ؟؟؟ لا طبعا
بإستثناء الحضري وأبو تريكه الذان بذلا مجهودا يحسب لهما
ولكن بمفردهما لا يحققان فوزا ,
فأداءنا في هذه المباراه عموما كان أداء إنهزامي من بدايته

ولاعبينا طبعا تأثروا بما أثير حول حادث سرقتهم في الفندق بإتهامات باطله لهم

وكل شعب مصر متأكد من براءتهم منها

ولكنهم كانوا أضعف من الموقف وأثبتوا أنهم مازال أمامهم الكثير
ليصطفوا في صفوف الرجال

الذين لا تهزهم النوازل ولا تؤثر فيهم الإشاعات المغرضه
لأنهم يثقون في أنفسهم.

فهل لعيبة مصر ينقصهم الثقه في أنفسهم والرجوله التي نتغنى لهم بها ؟؟؟؟

أنا عن نفسي كنت أتمنى أن نخرج منهزمين
من فريق كإيطاليا ويكون سببا في إقصاءنا عن البطوله

عن أن يتم إقصاءنا بيد فريق لا يحمل أي تاريخ كمنتخب أمريكا

فالخروج والهزيمه على يد البرازيل وإيطاليا أشرف ,

وربنا يستر في مشوار التأهل لكأس العالم
بعد أن صعبت الجزائر مشوارنا بفوزها على زامبيا في أرضها

فهل سيتمكن هذا الفريق من ان يعوضنا بتأهله في كأس العالم
ويربح كل مبارياته المتبيقيه في مشوار التصفيات؟

الله أعلم
________________________________________
تحديث
أمريكا فازت على أسبانيا 2/0
هههه مش أحنا بس اللي أتوكسنا معاهم في شركاء لنا
بطوله غريبه
الفريق الأمريكي كان حاجز تذاكر العوده قبل لقاء مصر
بس واضح أن جنوب أفريقيا عجبتهم فقرروا يطولوا مدة إقامتهم فيها شويتين

هناك 25 تعليقًا:

صيدلانيه طالعه نازله يقول...

يعنى حضرتك مكنتش ملاحظ ان الفريق معظمه اتكسر فى ماتش ايطاليا حتى فى ماتش امريكا كل التغييرات كانت اضطراريه للاصابه
حرام بجد الفريق فعلا الظروف لعبت ضده و بعدين احنا مكناش متوقعين المستوى الرائع اللى ظهروا بيه فى ماتش البرازيل و ايطاليا
يبقى المفروض بعد الهزيمه نقلهم هارد لك و انشاء الله ماتشات التصفيات مستنيه تركيزكم و احنا وراكم

ahmed_k يقول...

صيدلانيه طالعه نازله



طبعا لاحظت ولاحظت كمان أن الإصابات مكانتش بهذا الكم إلا في فريقي مصر والعراق يا ترى ايه السبب ؟؟؟
باقي الفرق بيتغذوا لحمه ولعيبتنا بيتغذوا كورن فليكس
يا فندم ده فريق مكلف الدوله ملايين الجنيهات وبيمثل البلد كللها فمش مبرر أبدا لهزيمتهم أن في إصابات أمال الجهاز الفني دوره أيه؟؟ مش المفروض في بدائل بنفس المستوى وتسد نقص أي إصابه في الأساسي
أمال عصام الحضري أدى وهو مصاب كما هو سليم ليه ؟؟ ولكن خطوط دفاعنا الهزيله في هذا الماتش لم يكن ليستطيع بمفرده تحمل عبئ الحفاظ عن المرمى
في ماتش إيطاليا يا دكتوره لولا الحضري وتوفيق الله لكانت النتيجه على أقل تقدير 4/1 لإيطاليا
رغم أن إيطاليا في هذه البطوله بالكامل ليست بالمستوى المطلوب وشاهدي الإنتقادات الموجهه لهم في بلادهم
طبعا مش حنكر المستوى الجميل في مبارتي البرازيل وإيطاليا لكن أين هذا المستوى مع فريق ضعيف كأمريكا تلاعبت به إيطاليا الضعيفه والبرازيل
أهذا فريق يهزمهم وبهذه النتيجه الكارثيه
وأيضا ألا يعلم فريقنا منذ قبل البطوله أن مبارياتها تقام كل 72ساعه
فأين الإعداد للبطولات المشابهه
وأليست كأس أفريقيا وكأس العالم ايضا مبارياتهم متقاربه للفرق فبدلا من السهر والإحتفال كان لزاما عليهم بدء التأهيل النفسي منذ خروجهم من مباراة إيطاليا
يا فندم هم أحتفلوا في ليلة ماتش إيطالياولم ينالوا قسط الراحه المطلوبه ثم فوجئوا بالسرقات والإتهامات الباطله التي أطلقت عنهم في جوهانسبرج
ولكن أين الثقه وأين الجهاز الفني والإداري في تحمل تلك الأعباء والضغوطات عن اللاعبين ؟؟ورغم ذلك فهل يحق لهم الإمتناع عن التمرين لإشتراطهم أن يقدم عمرو أديب إعتذار لهم عن ما جاء ببرنامجه من تصديق للإشاعات !!!!
وهل عمرو أديب يمثل كل شعب مصر لكي نعاقب جميعا بسببه
طبعا يا دكتوره أحنا وراهم في مشوار التصفيات علشان هم يحملون ويمثلون أسم مصر ولذلك فمن حقنا عليهم أن يحسنوا التمثيل لهذاالإسم
يا دكتوره كلمة هارد لك تقال لو أنهم بذلوا ما عليهم وهزموا كما حدث أمام البرازيل لكن ماتش أمريكا لا اللاعبين ولا الجهاز الفني أو الإداري أدوا ما عليهم ولكن الظروف عاكستهم بالعكس
التقصير واضح حتى في خطة وتشكيلة الفريق
ودعيني أتسائل لماذا التمسك بأحمد حسن كلاعب في المنتخب رغم بطئه وسوء مستواه الواضح في السنوات الأخيره أيعني هذا إفلاس أنديتنا في النجوم والمواهب القادره على اللعب في مثل تلك المباريات ,
لماذا لم يدفع المعلم بحمص الحاصل على أفضل لاعب في المباراة السابقه ودفع ببعض اللاعبين الذين لا يغنوا من جوع
ولم يكن لهم أي دور كأبو جريشه مثلا
تأكدي يا دكتوره لو المنتخب هزم رغما عنه بعد أن أدى ما عليه لم يكن أحد لينتقدهم أبدا لكن التقصير واضح سواء من اللاعبين أو الجهاز الفني والإداري
وعليهم مواجة أخطائهم بدلا من أن نضحك عليهم بالمديح حتى لا تتكرر تلك الفضايح

سيبك من الكوره يا دكتوره المهم دلوقتي أن حضرتك نورتيني وأسعدتيني بمرورك وتواجدك
تقبلي خالص تحياتي

على عبدالله يقول...

السلام عليكم

انت عندك امل فى الصعود لكاس العالم ؟!
انا باتمنى والله لكن
وما نيل لمطالب بالتمنى ولكت تؤخذ الدنيا غلابا !

وبعدين انت ما اخدتش بالك من ((ميس ايجيبت)) الى كانت بتمثل مصر فى الماتش ...اهى طلعت قدمها شؤم عليهم
بيقولوا اصابات ! طيب فين بقى البدائل ؟! هو عشان غياب زيدان وسيد معوض نبطل لعب خلاص
لكن انا تقريبا عرفت السبب فى المهزلة دى ! لو لاحظت ان الاستاد كان فاضى ! لان كل الجماهير راحت لماتش البرازيل واطاليا ،، واحنا لعيبتنا يا سيدى اما تشوف تشجيع الجماهير وخصوصا ((؟؟)) بتلاقى اللاعب من ول بياكل فى نفسه اكل
يعنى زيدان افندى لولا انانيته فى ماتش ايطاليا وشوية الحركات اللى بيستعرض بيهم ما كانش عمل ((سكروو)) ميعملوش ((مبتدأ)) لكن الباشا بيقدم ((المهر)) لولا كدا ماكنش اتصاب ولا نيلة
:)

سيبك انت
وبعدين من امتى بتشجع كورة ؟!
انا اعرف انك مالكش فى الكورة ولا اييييييه !

تحواتى وتقدوراتى

وردة يقول...

هو في كلمة واحدة ممكن تتقال
حسبي الله ونعم الوكيل
في اي حد
سرق الفرحة اللي كنا بنتمناها
سلام

محمد الجرايحى يقول...

أخى الفاضل: أحمد
السلام عليكم ورحمة الله وبركاته
هناك عوامل كثيرة أدت إلى هذا المستوى الذى ظهر عليه المنتخب أولها الإجهاد البدنى والذهنى ..المجهود المبذول فى مبارتى البرازيل وإيطاليا مجهود خرافى ولم يتعوده لاعبينا...
وكذلك الإصابات ..التى أدت إلى أن يفقد المنتخب قوة ضاربة مثل زيدان وكذلك السيد معوض...
وعموماً المشوار مازال طويلاً
تقبل تقديرى واحترامى
أخوك
محمد

عايش... ولكن !!!! يقول...

يا استاذى العند يولد الكفر زى ما بيقولوا
وحسن شحاته عاند مصر كلها
مخدش ميدو وقولنا يلا هو ادرى
ساب شريف عبد الفضيل وقولنا هو ادرى
بيلعب احمد حسن وهو مبقاش بيعرف يباصى كوره صح وقولنا يمكن هو ادرى
بعد ما حمص بقا فورمه ركنه ع الدكه وقولنا هو ادرى
فرض علينا احمد سعيد اوكا والواد مكدبش خبر واثبت كفاءه وبعد كده قعده ع الدكه ولعب احمد فتحى مساك من قلة المساكين فى مصر وقولنا هو ادرى

وللأسف مش هنصعد كاس عالم وبردو هو ادرى

للعلم احمد فتحى جتله اصابه هيقعد 6 اسابيع بعيد عن الملاعب
وسيد معوض بردو اصابته صعبه وبيحاولوا يجهزوه
ومعندناش مهاجمين غير زيدان ويارب يرجع وطبعا مش هيضم ميدو لانه معاند معاه وعمرو زكى فى مشاكل بينه وبين حسن شحاته

الله يصبرنا

بحب كل الناس يقول...

المستوى فعلا كان سئ

وطبعا اللعيبة المحترفة اللى متقدرش تلعب 3 مباريات فى اسبوع

امال كانو بيعملو ايه فى النوادى

...........

وربما يا استاذ احمد الموضوع بتاع الاشاعة اللى طلعت ديه كانت لها تأثير على اللا عبين

marmar يقول...

سوء الحظ اللي كان مصاحب كل لعيبه المنتخب في ماتش امريكا كان بسبب حاجات كتير اوي
1- كم الاشاعات اللي طلع عليهم من الاتهامات الباطله الكدابه اللي اتهمهم بيها مواطن مصري كلب زي عمر اديب واتكلم عن شرفهم وسمعتهم في حين ان لعيبه البرازيل في نفس اليوم اتسرقو ومحدش لا اتكلم ولا حاجه هل كل الاشاعات دي كان بس عشان مصر خسرت !!
وهل عمر اديب حتى لو كان فاكر نفسو صادق في كلامو وهو عارف ان كل كلمه بيقولها كدب وعايز يعمل من الحبه قبه زي ما بيقولو عشان بس يكبر من نفسو ومن برنامجو الفاشل !!
ازاي كلب زي ده يتكلم عن منتخب بحالو وعن لعيبه في كل ماتش بيسجدو لربنا وفي كل صلاه بيصلوها في موعدها وابو تريكه اللي بيصحيهم في كل صلاه فجر عشان يصلو جماعه وهو بنفسو قال في حلقه هيفا بالنص " انا اعترف ان هيفا وهبي افسدت صيامي بجمالها وحركاتها "
يعني ده واحد يتاخد منو كلمه ولا يتزعل على كلامو اكيد لا طبعا لانو شخص تافه وحقير والحمدلله اللي كان كل الشعب المصري مستنيه وهو الاعتذار الرسمي من عمرو اديب نزل واعتذر لكل المنتخب ولكل الشعب المصري عن كلامو
وده كان اكبر سبب ان كل اللعيبه كانو في حاله نفسيه زي الزفت ده غير انهم كلهم كانو مصابين حتى اللي بيلعبو بيلعبو وهما تعبانين ومصابين
وحزينيين على كل حاجه
ومحدش يقدر ينكر المستوى الهايل اللي عملوه في ماتش برازيل وماتش ايطاليا بجد رفعوا راسنا ورفعو راس كل العرب بفوزهم على ايطاليا
اي حد شايف ان كلامي غير صحيح وان مصر ملعبتش كويس عشان مستواها مش كويس او او او فيبقى كلامو غير صحيح

kochia يقول...

عشان الحسد ؟؟؟
والله ممكن برده

يا سيدي دي كورة
يعني ملهاش حاجة تقف عليها ولا تقعد عليها .. لازم تلف كدة علي طول

المرة الجاية نكون احسن
فحظنا يكون افضل
ان شاء الله

norahaty يقول...

السلام عليكم ورحمة
الله تعالى وبركاته
احنا لا ميزان لنا ولا مقياس
كل حاجتنا بختك ياأبو بخيت فعلا
ماعندنا نفس للامور (البعيدة المدى)
المهم انا جايه اصبح على حضرتك لما
لقيتك معلق عند مدونة صديقة:
وصبـــــاح الفل يافندم
نهــــــــــــــارك ابيض:)

صيدلانيه طالعه نازله يقول...

اتفق معاك فى موضوع احمد حسن لانه خانقنى انا كمان يستلم الكوره من هنا و يفضل ماااااااشى مااااااشى لغايه ما تتخطف منه ساعتها يرجع و هو مبسوط عشان كابتشن الفريق عمل اللى عليه
كل همه انه يتصور وقت طويل بالكاميرا
هههههههههههههههه

صبرني يارب يقول...

يا سيدى اهو برضه شوفنا نفسنا يومين على العالم وكسبنا ايطاليا

انتم هاتنهبوا ولا ايه

والا هزيمه سياسيه دي على فكره توقعت فى ناس هاتقول كده مش عارفه ليه
هههههههههههههههه

اصل احنا عندنا هسهس

ربنا يصلح حالهم يا اخويا منتخبنا ويصلح حال الشعب التعبان الغلبان الجعان ده

ورجال الاعمال يعطفوا عليه زي ما بيهادوا اللعيبه كده


تحياتي لحضرتك وطولت الغيبه ليه

همس الاحباب يقول...

الهز يمة واردة فى الرياضة
واعرق المنتخبات هزمت
ولكن الكارثة فى المستوى والاستهتار واللامبالاة التى ظهرت على الجميع فى مباراة امريكا
هناك اصابات وهناك ارهاق ولكن اين البديل اين الجهاز الفنى وما هو دوره
لاقدر الله الفريق نصه اتصاب
يبقى كده ننسحب ونقعد فى بيوتنا احسن
طالما ملايين من لاعبى الكرة لا تستطيع ان تجد منهم 25 لاعب للمنتخب على نفس الكفاءة يبقى عليه العوض فيكى يا مصر
تحياتى

mohamed ghalia يقول...

احنا بجد فريق عجيب جدااااااااا
نكسب الكاميرون والسنغال وكوت ديفوار
ونلعب كويس مكع الفرق الكبيرة
ونيجى بقى نخسرأو نتتعادل مع بنين ونامبيا والجزائر وجيوبتى وموريتانيا

حاول تفتكرنى يقول...

مرحبا احمد حمد لله على السلامة

بالنسبة لمبارايات الكرة التي تجتذب وطقوسها الخاصة النسبة الأكبر منا ، وما تحتوية - دائما - من توقعات محسوسة وغير واقعية

من هنا اتحدث عن منتخبنا ، الذى يجب أن نتعرف أنه ليس الأفضل فى القارة لعبا ولياقة ، حتى على اعتبار انه بطل القارة عدة مرات ، فلو بحثت عن سبب انتصاراته ستجده نفسي بالدرجة الأولي ، فيحتاج دائما إلى شحذ الهمم ، واثارة الحواس ، وتحفيز النفس

وكذلك نظرتنا إليه نفسية ولكن فى اتجاه مغاير

وعندما تصطدم - اتجاهاتنا المغايره - ينتصر بدوافعة فى اللوقت الذى ننتظر فيه هزيمته ونبررها ونقبلها ، فنضخم اداءه - حتى لو كان ضخما - لانه انتصر على المنافس وعلى احساسنا بصعوبة الموقف ، وبنهزم عندما يعتمد على عناصر اللعبة - التي ليس فى صالحة - فيهزم فينا توقعاتنا بانتصاره لأننا اعتدنا على تفوقه

فى النهاية
هذه هي كرة القدم
هزيمة ، نصر ، توقع ، حرقة دم ، فرحة

ومكاسب مالية يدفعها المعلن للمعلن له

تحياتي

نور الدين يقول...

أخى الحبيب أحمد
.............
السلام عليكم ورحمة الله
شوفت بقى مش لو كنا شوفنا الماتش سوا يمكن كانت مصر غلبت
لكن نصيب واوعى تكون زعلان منى وان شاء الله لاززم هيكون لنا لقاء قريب
وبردو والله المنتخب قدم أروع مبارياته فى نظرى لكن ربما الجهد كان اكبر من طاقته ويكفى أنه ادرك حجمه وانه ممكن يهزم اعظم قوى العالم كرويا طبعا
وربنا يسهل ياصديقى بقى مع رواندا
تحياتى الخالصة لقلبك وذوقك الرفيع
أخوك
نورالدين محمود

egyboy يقول...

فى أخطاء كتير فى الماتش بس الفريق باين عليه إنه كان مجهد وزى ما مدرب ايطاليا قال جربنا خطة جديدة ولم تصلح هذا المساء احنا كدا برضوا وربنا يستر فى تصفيات كأس العالم

ahmed_k يقول...

علي عبد الله



وعليكم السلام ورحمة الله
إزيك يا علي أخبارك أيه ؟؟
بص بقا يا علي أنا متابع جيد للمنتخب المصري في البطولات الدوليه لأنه يحمل أسم البلد كللها في هذه الحالات
ومتابع لمتشات نهائي الدوري لكن اللي خلال الدوري مش فضيلها بصراحه ههههه
وعندك كأس العالم بتابعه من ألفه لياءه بس كده يعني لي في الكوره بس على خفيف
أذكر وأنا صغير كنت أهلاوي متعصب جدا
وكنت أتابع الأهلي كدروسي بل أكتر أحيانا وطبعا المنتخب لكن دلوقتي أنا أهلاوي أينعم لكن مش بالتعصب بتاع زمان ومش بتابع أوي يعني
لكن البطولات القاريه والدوليه المشاركه فيها مصر بعشق متابعتها
ومعايا مخزون من الأعلام لزوم زفات بعد الفوز ههههههه
وعلى رأيك ميس إيجبت كان وشها نحس
ده كويس مجابوش معاها الوصيفات بتوعها علشان الفضيحه تكون كامله
حاجه تكسف
منورني يا علي الحبه دول
دمت بكل خير
*******************************************
ورده



أي والله يا ورده
كانت فرحه منتظرينها لكن قدر الله وما شاء فعل
ربنا يسهل في الجايات
منوره يا ورده
تقبلي خالص تحياتي
**********************************************
محمد الجرايحي



وعليكم السلام ورحمة الله وبركاته
أهلا وسهلا بك أخي محمد
ودعني أختلف معك المره دي
دولا لاعبين دوليين في أنديتهم بيبزلوا مجهود مشابه لتلك المباريات
وأصبحت الكره شغلهم وأكل عيشهم
فعودين على مثل هذا الإجهاد ولكن لابد من العمل منذ الخروج من الماتش للتأهل للماتش القادم من النوم مبكرا وعدم السهر ورغي في التليفونات
لكن ده مبيحصلش لأننا شعوب عاطفيه فبعد الفوز الموبايلات بتشتغل القرايب والزوجات والعيال و الجيران طبعا حيركزوا إزاي,
أما بخصوص الإصابات فالجهاز الإداري والفني لابد أن يعمل حسابها
بس إحنا لعبنا بتشكيله غريبه وخطه غريبه فكانت الهزيمه حتميه
ربنا يسهل في مشوار التصفيات لعل فيها العزاء لكل شعبنا
وتقبل يا أخي خالص تحياتي
*********************************************
عايش... ولكن !!!!



هههههه طبعا هو أدرى
بص أنا رأيي أن ميدو أخلاقه لا تؤهله ليكون في تشكيلة المنتخب مهما كان مستواه
لأن الكوره مش لعب وبس لأ دي أخلاق كمان
أما باقي الهو أدرى فأتفق معاك فيها
وتقبل يا صديقي خالص تحياتي
******************************************
بحب كل الناس



طبعا ليها تأثير عليهم
بس هما السبب في نموها لهذا الحجم بسكوتهم عنهاوعدم تكذيبها في المؤتمر الصحفي,
وهما بيمثلوا بلد فعيب أوي تأثر عليهم إشاعه هما متأكدين من مدى صحتها من كذبها وده اللي أسمه الثقه في النفس
وربك يسترها في تصفيات كأس العالم
دمت بكل خير

ahmed_k يقول...

marmar



أولا إزيك يا ريم طبعا أنا مقدر شعورك بعد ما كنتي سعيده جدا ومنتشيه بفخر بسبب مستواهم في الماتشين الأوائل
أما بخصوص الأسباب فعمرو أديب لم يطلقها بل هو نشر ما كتبته الصحافه في جنوب أفريقياوكان ذلك بعد هزيمة أمريكا يعني الراجل كان زعلان من مستوى منتخبنا اللي ظهر بيه بعد ما شرفنا وأعتذرلهم
طبعا هو قال الخبر بشكل فخ وغير مقبول لكنه أعتذر وهذا يكفي
فهو ليس سببا لهزيمتهم لأنه لم يتحدث في هذا الأمر إلا بعد هزيمتهم من أمريكا
وغير كده هو إستغرب أنهم لم يدافعوا عن أنفسهم خلال المؤتمر الصحفي بتاعهم قبل الماتش
انا مش بدافع عن عمرو أديب لأنه مش ملاك هو كمان لكن ماتش زي ده يخصنا كلنا أما الأمور الشخصيه فهي أمر بين الشخص وربه لا دخل لنا فيها
المشكله أن اللاعبين لم يقدموا الإعتذار لشعب مصر عن مستوى هذا اللقاء ولكن قدموا مبررات أقبح من ذنب ,
طبعا اتفق معاكي في المستوى الهايل في الماتشين الأوائل لكننا لا نحسن الحفاظ على الجوده دائما وللأسف مش في الكوره بس
لكن نحمد ربنا أن أمريكا فازت على أسبانيا وأهوه عذر يمكن يسكت كلاب المنتديات اللي نزلوا تريقه على مصر
بعد ماتش أمريكا

دمتي بكل خير
********************************************
kochia



من بقك لباب السما يا كوشيا
إن شاء الله الجاي يكون أحسن
ونقدر نوصل لكاس العالم يارب

تقبلي خالص التحيه
*********************************************
norahaty



وعليكم السلام ورحمة الله يا دكتوره
صباحك فل يا فندم
والنفس الطويل يأتي بالتخطيط طويل الأمد وده فن إداره لدينا فيه نقص حبتين
ربك يسترها
منوره يا فندم
في أمان الله
********************************************
صيدلانيه طالعه نازله



هههههههه مش عارف والله سر التمسك بيه أيه
عموما ربنا يسترها ونقدر نوصل للمونديال
أسعدتيني بتواصلك يا فندم
دمتي بكل خير
*********************************************
صبرني يا رب



حكاية هزيمه سياسيه دي أنا بقولها تريقه لأني سبقتها بأنني تخيلت
طيب أسبانيا برضو هزيمه سياسيه ؟؟؟
لأ طبعا كل ما في الأمر إن الله لا يضيع أجر من أحسن عملا
ومنتخبنا في الماتش ده لم يحسن العمل
لذلك الهزيمه كانت حتميه
منورانا يا أم مريم
تقبلي خالص تحياتي

ahmed_k يقول...

همس الأحباب



صدقت يا خالد الهزيمه مش هي القصه
أحنا إنهزمنا في ماتش البرازيل وأحتفلنا بالهزيمه لأنهم كانوا رائعيين وأدوا ما عليهم لكن المصيبه في المستوى الهابط في ماتش أمريكا
وأهو كويس أسبانيا إنهزمت من أمريكا يمكن هزيمتهم تحمي وشنا شويه ههههه
منورني يا خلود
في امان الله
********************************************
mohamed ghalia



لا والله يا محمد مطلعناش أحنا بس
أهوه أسبانيا حصلتنا وأتوكست وكستنا بس في الدور قبل النهائي يعني عدوا الخط بشويه
منورني يا محمد
في أمان الله
*********************************************
حاول تفتكرني



الله يسلمك يا فندم
والله عندك حق وكلامك صح الصح
فريقنا القومي بيلعب بالنفسيه أكتر من المهاره
منورني يا فندم
دمت بكل خير
********************************************
نور الدين



وعليكم السلام ورحمة الله
إزيك يا نور إن شاء الله حكون قريب عندك في مصر وربنا يسهل وأشوفك
وبصراحه أنا كتبت البوست ده من حرقتي
كان نفسي مصر تفوز وكنت محضر الأعلام
بس قدر الله وما شاء فعل
دمت بكل خير يا صاحبي
*********************************************
egyboy



إزيك يا دكتور وأسعدتني بأولى زياراتك
وأتمنى نشوفك هنا دايما
ومعاك حق الخطه دي كانت مأساه
مش عارف المعلم عملها كده ليه
وربنا يستر في مشوار التصفيات للمونديال
تقبل خالص تحياتي

جريدة الصباح العربي يقول...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

نهر الحب يقول...

اصبت يا احمد نخرج على ايد فريق ذو تاريخ غير اننا نخرج على ايدى
فريق حديث العهد بكرة القدم


سملت اناملك يا ك

غروب يقول...

فعلا احنا كان مستوانا ضعيف اوى في الماتش ده لدرجه ان الواحد اتحرق دمه جامند يعنى

بس قدر الله ومش شاء فعل انا كنت قاعده ادام الماتش بدعى ان البرازيل تجيب كمان جون


تفتكر الماتش ممكن يكون متباع فعلا ؟؟؟؟ظ بتحصل دي بجد؟؟؟؟؟؟

بس كمان اللعيبه كانوا ناقصين كتير

زيدان وعمرو زكى وعماد متعب واحمد حسام ميدو فين دول ؟؟؟؟

يلا خير بقه

اللؤلؤة يقول...

أحمد k
السلام عليكم ورحمة الله وبركاته
أنا كنت حاسس قبل ماتش أمريكا إن إحنا هنتغلب لأن اللعيبة حصلهم غرور بعد ماتش إيطاليا وكمان الخطة كانت وحشه واللعيبه كانوا مصابين وكمان كان فيه تأثير من اللعيبه وذى ما حضرتك قلت هم إثنين إللى بيلعبوا أبو تريكة والحضرى
دمت بكل الود

ahmed_k يقول...

جريدة الصباح العربي



شكرا لدعوتكم الكريمه
خالص تحياتي
********************************************
نهر الحب



الله يسلمك يا نهر
بالفعل بس إظاهر أنه حيعمله تاريخ في البطوله دي أهوه وصل للماتش الفاينل

تقبلي خالص تحياتي
*********************************************
غروب



لأ معتقدش حكاية البيع دي
وإلا فهل أسباميا بطلة أوروبا حتبيع لأمريكا كمان الماتش لأ طبعا
كل ما في الأمر بعض الثقه الزايده وإستهانه بالخصم أدت لهذه الهزيمه الكبيره
وحكاية أن في لعيبه ناقصين دي مشكلة الجهاز الإداري والفني إيجاد بدائل على مستوى يسد عجز أو غصابة اي لاعب
فمش معقول بلد بحجم مصر وأنديتها مش قادر يجمع 25 لاعب بقدر عالي من الكفاءه
وربنا يستر في مشوار التصفيات للمونديال

دمتي بكل خير
***********************************
**********
اللؤلؤه



وعليكم السلام ورحمة الله وبركاته
صدقت فكل الأسباب تلك مجتمعه ممكن تؤدي للهزيمه التي رأيناها جميعا
ربنا يستر في مشوار التصفيات الباقيه

مع خالص تحياتي