الأحد، 20 يوليو، 2008

سينما في سينما

السينما هي مرآة الشعوب
فقد توثق السينما لمرحلة تاريخية ما
وقد توثق لحدث معين أو لمكان معين
فنحن لم نعرف مصر في أوائل القرن العشرين الا من خلالها
فوثقت للثورات كثورة 1919 وثورة 1952وكذلك لكل الأحداث التي مرت علي مصر
ولكنها في بعض الأحيان تكون اداة لخلق مفهوم جديد
او لبث فكره او معتقد جديد,فهي وسيله عظيمه لبث اي فكر الي نفوس الناس وتغيير نظرتهم لذلك الفكر.
قد يكون فكرا بناءً , وقد يكون فكرا هداماً
وقد شاهدت منذ مدة طويله احد الأفلام التي تضع السم في العسل
وتنشر بشكل غير مباشر لفكرة هدامه
الفيلم لا أذكر اسمه ولكنه من بطولة محمود يس
ودوره فيه دور مسجون يجيد أعمال الكهرباء
ومأمور السجن ظهر بشكل رجل طاغيه ,لا تعرف الرحمه الي قلبه سبيل
وكان حينما يحدث عطل كهربائي في منزله يرسل هذا السجين الي المنزل لأصلاحه
وبعد عدة زيارات نشأت قصة حب بين السجين(محمود يس ) وزوجة مأمور السجن
كانت على إثرها تقوم الزوجه بعمل عطل متعمد في الكهرباء
حتي يرسل لها زوجها بذلك السجين لأصلاحه,
وتشبع معه تلك الزوجه من نهل المتعة المحرمه بدون اي رادع من قدسية كونها زوجه
وتكررت تلك الزيارات حتي شعر الزوج بهذه العلاقه
فدبر لهما مكيده , حيث ارسل السجين الي بيته وأظهر الأمر كأن السجين قد هرب من محبسه
واطلق خلفه القوات وبرفقتها الكلاب البوليسيه والتي قد طاردته
حتي تمكنت منه تلك الكلاب وقامت بنهشه فقتلته
وكانت الزوجة في بيتها قد سمعت اصوات اطلاق النار مع نبح الكلاب فخرجت تهرول خلف حبيبها
ووقفت امام جثته تبكي وارتمت عليه امام زوجها ورجال الشرطه,
هذه اللقطه الأخيره تصور مدي وحشية الزوج وتجعل المشاهدين في قمة التعاطف مع الحبيبان
في حين انهما الجناة الأصليين
فهما قد اغترفوا من مناهل المتعة المحرمه
وهذه الزوجة خائنه لزوجها ولشرفه وشرفها
فأنظروا ما تحاول السينما الهدامه ان تفعله في عقولنا وتفكيرنا
من تخرييب وهدم لكل قيمنا وعاداتنا وتقاليدنا
ان جميع الأديان تجرم الخيانه الزوجيه وتجرم اي نظرة تعاطف مع طرفي الخيانه
ولكننا في عصر انقلبت فيه قيم كثيره حاول دعاة التخريب بثها في نفوس الناس
واستخدموا لذلك كل ما أستطاعوا من وسائل
ولكن الحمد لله ما زال الكثير والكثير متمسكون بهذه الأخلاقيات
ولديهم الوعي الكامل بما يحاول دعاة الهدم بثه ونشره
ويعلمون تلك الأساليب التي تستخدم كلمات لها بريقها كالحريه والتقدم والمدنيه

هناك 35 تعليقًا:

مع اصرارى يقول...

ازيك يا أبو حميد
جيت الحق أول تعليق
وأشكرك ع الواجب وإن كان لا شكر على واجب.
على فكرة أنا عملت الواجب بتاعك وعاوزك تعلم الكراسة.
فيا ريت تزور تدوينة أهلا بيكم فى مدونتى.
راجعلك تانى.
مع أبلغ تحياتى
السلام عليكم ورحمة الله

مع اصرارى يقول...

جميل الموضوع يا أحمد
وفيه دعوة للتأمل
أعتقد إن المشكلة مش فى السينيما
المشكلة فى الفكر وفى الرواية
لكن ظهور السينيما وضح المشكلات أكتر
وخلاها متاحة للقراء وغير القراء
وأتاح فرصة تفكر للمثقفين وغير المثقفين.

تعرف
خطورة التفكير من غير هدى واتباع الهوى
أخطر من الهندسة الوراثية والتهجين والاستنساخ.
الأخير بيلعب فى شكل الكائنات وتركيبهم
والأول بيعك فى فكرهم وسلوكهم.
النهاردة علماء كتيير بيستنكروا استنساخ البشر لإن الخطورة مادية وملموسة وواضحة
لكن خطورة التفكير الغير سوى ونتايجه أخطر بكتيير
وخاصة بعد ظهور السينيما و الخطورة النهاردة مش مجرد سينيما وبس لا ده موضوع فضائيات وحرية تعبير واللى عاوز يتكلم يتكلم ما دام ما بينطحش يبقى الكلام مش مشكلة

موضوعك جميل جدا
ومثير للتأمل والتفكر
ربنا يجازيك خير

مع أسمى تحياتى
السلام عليكم ورحمة الله

Saudi Romantic يقول...

السلام عليكم

اخي العزيز احمد

اتمنى ان تكون بصحه جيده..

في احد التعليقات المتبادله بيني وبينك كنا قد تطرقنا للمفاهيم السامه اللتي تبث من خلال افلام السينما ..وكنت وعدني ان تكتب موضوع عن هذا..والحمدلله انك اليوم تكتبه وتوفي بوعدك لي..اذاً شكراً لك..

اضحكتني قصة الفلم المذكور اعلاه..وما اضحكني به هي سطحية من يكتبون افلام من هذا النوع بدون ان يلتفتوا الى عقل المشاهد..ولكني اعتقد ان هؤلاء الكتاب هم يكتبون ما يحلمون به ويعكسون لنا شخصياتهم وافكارهم الساذجه من خلال كتاباتهم الغبيه..اخي احمد اني ارى في ما كتبت الكثير من الرحمه تجاه هذا النوع من الافلام..إما انا لن ارحمهم في تعليقي..لنتذكر افلام ناديه الجندي وبطولاتها الحديديه ومقولاتها الشهيره مثل ( سلم لي عالبدنجان )هههههههه في كل افلام ناديه الجندي نرى تلك العجوز المتصابيه المتعريه وهي تريد ان تقنعنا بإمكانياتها الجسديه..ونحن نعرف انها تمثل من ايام الابيض والاسود ومع هذا تطل علينا في افلامها الحديثه بشخصية الفتاة المغريه..!!..شيء غريب ذلك التفكير من عجوز مثل ناديه الجندي..ولنلقي نظره على العجوز الاخرى المسماه ( يسرى )..!!..يسرى تمثل من بداية السبعينات اي من اكثر من ثلاثين عاماً..وقبل يومين كنت اتفرج على التليفزيون ووضعت قناه معينه لا اتذكر اسمها ..ووجدت في تلك القناة مسلسل حديث ليسرا وكان المشهد الموجود تقول فيه يسرى لحبيبها
((انت عارف ؟ انا عندي 33سنه ومش عاوزه اتجوز ))
هههههههههه مشهد اضحكني كثيراً لعجوز متصابيه على مشارف الستينات..الا تعرف يسرا اننا نعرف متى بدأت التمثيل ..؟..!! يا يسرا مهما كثرت الالوان في وجهك نحن نعلم انك قاربت سن الستين عاماً فلماذا تحاولين خداعنا بغباء..؟..!!..
((هاني رمزي)) بحكم انه مسيحي ومنتج افلامه مسيحي..تتمتع افلامه دائماً بكثير من المايوهات والمناظر النسائيه البحريه..ولا انكر هنا ان افلامه بها افكار جميله ولكن الطبع غلب التطبع..
(( فيفي عبده )) ( الرقاصه البيئه )
تفرض نفسها علينا من خلال المسلسلات وتمثل لنا دور (الست اصيله ).!!!!!!
كيف تكون راقصه للمساطيل وتتاجر بجسدها وتتاجر بالخمر ثم تدعي انها (اصيله).!!!!!!!!!!!!!!!!!!!!!!

ولله تعبت من الكتابه ومن زحمة الافكار الحاظره في عقلي الان ربما افقد السيطره على تنسيقها..فجعبتي مليئه بالكثير ولكني سأتوقف عن الكتابه عند الست اصيله .

اشكرك اخي احمد على الموضوع المتميز..فعلاً المتميز انتاجه ايضاً متميز .

في امان الله

ahmed_k يقول...

مع اصراري

يا عم مصطفي الواجب اللي انت حاله مش بتاعي ده بتاع أ/احمد كمال
كنت حتي عملتله كوبي
عموما ولا يهمك بلاش منه الواجب المتعب ده
******************************************************
مع اصراري

المشكله ان في الأيام دي ناس بتستقي كامل ثقافتهم من السينما والتليفزيون
وهنا مكمن الخطر ان لم يتم توجيه تلك الأدوات التوجيه الصحيح

شكرا لك لتعليقك الجميل
ودمت بكل ود أخي مصطفى
************************************************
سعودي رومانتك

اتفق معك في كل ما قلته
ويوجد ايضا كما قلت نماذج أخري قد تكون أكثر فجاجه
ولكن لمثل الفيلم الذي تحدثت عنه اسلوب خبيث في بث سمومه وسموم مؤلفه
وقد لا ينتبه الكثيرين لمثل تلك الألاعيب

وأشكر لك اخي تعليقك الجميل وتواصلك الدائم
دمت بكل ود

أليس في بلاد العجائب يقول...

سلمت يداك يا اخي :)

موضوعك دا هيفتح عليك ابواب كتيرة اوي .. عن نفسي ممكن اقعد اتكلملك فيه ايام .. بس انت اتدوشت مني كفاية هرغي حبة نونو:)

انا الاول متفقة جدا مع كلام و كلام سعودي رمانتك .. ولو اني مكنتش احب يذكر اسماء حتي لا يأخذ من ذنوبهم فهم لا يستحقون حسناته :(

المهم ..

حدوتة المرأة المتزوجة اللي بتحب علي زوجها دي ليها باع طويييييل اوي في الافلام المصرية ما شاء الله يعني هي طبعا في الاصل مقتبسه بس اللي اقتبست مخلاش عنده من الاحمر دا ويراعي ان امه و اخته و مراته وحتي بنته هتتفرج و هتترسخ في ذهنها ان الحدوتة دي عادية كده و الحب ملوش كبير .. عايزة تحبي حبي بس بما يرضي الله ..

ساعات بفكر افلام السبعينات اللي كلها دعارة و عري و ناس عايشين مع بعضهم بدون اي رابط شرعي .. بقول هي فعلا الدنيا كانت كده ؟؟ طب امي و ابويا اتربوا ازاي لما اللي حوليهم كده .. برجع اقول مستحيل يكون دا هو الشعب المصري وقتها .. انا مشفتش بعنيا بس شفت اهلي متربيين ازاي عائلات كتير مش بس ابويا وامي .. كده بيبوظولنا التاريخ بتاعنا :( منهم لله ..

فاكر بين الاطلال و اذكريني ؟؟ الام الام اللي حملت و تعبت و شالت .. لا وقبلهم اتجوزت و بارادتها و حملت في احشاءها ثمرة زواجها الشرعي .. اول ما قلبها يدق برة البيت تجري و ترمي كل دا ورا ضهرها ؟؟؟ تربي في بنت مش بنتها و تسيب ابنها لابوه يربيه ؟؟ دا مش بس سم دا تدمير كل اخلاق ممكن يكون الناس اجتمعوا عليها .. تغيير لمفاهيم العفة و الحياء و الاخلاص و العهد مع الله و قدسية الزواج ..

بس تعرف .. بمناسبة ذكر سعودي رومانتك للافلام المسيحية .. لو تعرف فيلم بحب السيما .. عن اسرة مسيحية متدينة المفروض ( ع اد فهمها ) الاب فيها بيمنع ابنه يروح السيما علشان هيدخل النار و فيها احداث كتيرة من خيانة و كذب و كلام كتير كده مش موضوعنا ومش هدفي ...

الفيلم دا فيه مشهد بجد احترمته اوي ولو اني مكنتش احب يتواجد حوار زي دا بس هو فعلا علي الاقل خاطره تجول في عقول الكثيرين ..
الاب بعد شوية ازمات نتيجة تشدده دا انطلق راح يسكر و يشرب و كل الممنوعات اللي كان محرمها اصبحت مباحة :(

هو ماشي في الشارع بعد اللي حصله دا بيكلم ربه المفروض .. بعيدا عن صياغه الكلام.. الجملة المفيدة اللي فيه فيما معناها ...

" انه كان نفسه يعمل الطاعه بحبه لربه مش علاشن هو خايف من النار "

الجملة دي اثرت فيا اوي .. علشان علي اد ما بحب اسمع حاجة تهزني من جوايا و تخليني اطيع ربنا رهبة منه ومن عذابه علي اد ما بحب اكون بعمل الطاعه دي وانا عايزة اعملها علشان بحب ربنا مش علشان خايفة من عقابه لو معملتهاش :)

نعبد ربنا خوفا من عقابه و طمعا في نعيمه و رضاه والاولي ان تكون مطيعا لله حبا له لانه من اعطاك واسبغ عليك من فضل نعمه :)

الحمد لله رب العالمين :)

واحدة فرملة .. كفاية دوشة باه
معلش طولت زي العادة :) معـــذرة

بس انت اللي بتكتب حاجات حلوة:)

متمردة .. Rebellious يقول...

ما شدني في الموضوع هو كلمة سينما لأني من عشاقها


والجميل أن العقل العربي كبير

لا يمكنه أن يتقبل كل ما يقدم له

وفي أي قالب

رؤيتك هنا أكثر من رائعة



متمردة .. Rebellious

كاميليا يقول...

الحقيقة انا شوفت بوست عنك عند اخى الشنكونى .. قولت اجى ازورك

مدونة راقية وجميلة
تسمح لى اخد جولة فيها وبعدين ارجع أعلق

دمت بكل الود والخير

تحياتى واحترامى

ورود و أشواك يقول...

صباح الخير يا احمد

موضوعك المرة دى مهم جدا
و فعلا السينيما بقت بتدخل لنا قيم و عادات غريبة
و فى اكتر من فبلم بيصروا انهم يخلونا نتعاطف مع الزناه و عاشقى المتعة الحرام تحت مسمى الحب
ذاك الحب الملعون الذى يروجون له بمشاهد رخيصة

حسبنا الله و نعم الوكيل

ما شاء الله مواضيعك كلها رائعة يا احمد

فى انتظار جديدك

جنّي يقول...

هكذا دائما الشيطان يزين الباطل لأوليائه ...
فيظهر الحق باطلا والباطل حق ..

وهذه رسالة الاعلام الفاسد والمثير للغرائز ..


شكرا

CAIROCOMPUTER يقول...

الأخ العزيز احمد زكى الدين
تحيه طيبه وشكرا على مرورك بمدونتنا ...مدونة اول برنامج اذاعى عن النت والمدونات فى الشرق الأوسط ....ونرجوا دوام التواصل
بالنسبه لأجابتك على سؤال بالمدونه لا نعلم ما اذا كنا ذعنا اسمك ام لا ان كانت الأجابه لا فنحن نعتذر لهذا السهو فنحن نهتم بكل رساله ....ونرجوا ان نسمع رايك فى اسئله اخرى طرحناها
وهنوان المدونه طبعا هو
http://netonradio.blogspot.com
والدعوه لزيارة المدونه والأجابه على الأسئله موجهه ايضا لزوار مدونتك
واى استفسار عنواننا هو
netonradio@yahoo.com

غير معرف يقول...

ياجماعه السينما والفن شىء والمواعظ الأخلاقيه شىء تانى ...الفن منذ الأزل يصور الصراع بين الخير والشر ...ولو صورنا الخير بس مش حينفع ....من غير صراع مفيش فن...دراما معتاها صراع ...والشر موجود وسيظل وليس عرضه سيعلم الناس الشر هذا تفكير سطحى وغير واقعى ...اما ملاحظة السعودى بان المسيحى ينشر العرى فهذا تعصب دينى وعدم فهم لمعنى الفن والا فليقل لى الا تتضمن سورة يوسف تفاصيل الخيانه الزوجيه؟

Saudi Romantic يقول...

السلام عليكم

الاخ الغير معروف..

كنت اتمنى ان تضع اسمك او اي اسم لكي

اناديك بإسم حتى لو هذا الاسم من خيالك

انا ضربت اكثر من مثال وكان من ضمن الامثله فيفي عبده المسلمه وهاني رمزي المسيحي..اعتقد بهذا اني لم اتعصب ضد دين بعينه..كان بإمكانك أن ترد عنهم جميعا بدون التركيز على الدفاع عن هاني رمزي المسيحي..ولهذا اعتقد انك انت من يوصف بأنه متعصب...
اضحكني كثيراً قياسك وفهمك لسورة يوسف في القرأن الكريم..ان كنت لاتعلم فاعلم ان قياسك لايعد قياساً لان الفلم الهابط لايقاس او يقارن بسوره من القرأن الكريم..ولاني شخص غير متعصب سوف اجاريك قليلاً وافهمك ما جهلته عن سورة يوسف..
انت تقول ان سورة يوسف تناولة الخياته الزوجيه وتتكلم وكأن هذا هو لب ماوجد في السوره الكريمه..لاوضح لك ما تجهله سورة يوسف لم تتناول الخيانه الزوجيه كما فهمت انت ولكنها تناولت قصة نبي الله يوسف عليه السلام وما تعرض له من ظلم من امرأة العزيز وكيف اكتشف القاضي انه مظلوم وكانت السوره الكريمه تتحدث عن انواع الظلم اللذي وقع على هذا النبي الكريم وكيف تغلب على كل هذا باتكاله على خالقه..
هذا ما كانت تتحدث عنه سورة يوسف ولم تتحدث عن خيانه زوجيه كما فهمت انت..
القرأن الكريم يحتاج عقل يفهمه..
اتمنى ان تقرأ القرأن كما يجب ان يقرأ.
شكراً لك

أليس في بلاد العجائب يقول...

بارك الله فيك سعودي رومانتك :)

احسنت الرد علي الاخ\الاخت غير معرف

هو ايه اللي الفن شيء والمواعظ الاخلاقيه شيء؟؟ مش فالحين ليل ونهار يقولوا احنا لينا رسالة و هدف ؟؟

لما مش الفن اللي هيسمو باخلاق الاجيال اللي بتستمتع بيه .. ايه اللي هيفيد منه يعني ؟ قولي الفايدة المرجوة منه لما المفروض نفصله عن الاخلاق والعيشة واللي عايشينها ؟؟

جديدة باه حكاية الصراع اللي بتتكلم عليه دي خير ايه و شر ايه .. هو اللي احنا اتكلمنا فيه دا ايه علاقته بالصراع اللي حضرتك اتكلمت عليه ..

ايه الخير في اني اتعاطف مع الزانية و اعيط علي الزوج اللي مات في حضن عشيقته ولا انتحر من عشقه ولا ولا ولا ؟!!! فهمونا يا عالم .. انا عن نفسي كده من الجاهلين ان كان هو دا العلم والمتعلمين :)

ووصفتنا احنا بالسطحية في حين انه واضح ان حضرتك لم تستوعب ما تم كتابته..

معذرة ان كنت رديت بس الكلام استفزني :(

بعتذر لاخي احمد ان كنت قد اطلت و رديت علي اد ضيوفه بدون اذن :$

جنّي يقول...

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

ahmed_k يقول...

اليس في بلاد العجائب

كل ده رغي نونو أمال المش نونو أد ايه ههههههه
يا اليس البيت بيتك تقولي اللي عايزاه وب الكم اللي عايزاه
انا مؤيد كلامك ان السينما في بعض الأحيان بتنقل صوره مشوهه عن تاريخنا
بس ميمنعش ان بعض تلك النمازج موجوده فعلا في مجتمعنا
بس المشكله اظهار تلك النمازج علي انها الوضع السليم واستدراج تعاطف المشاهد مع تلك النمازج هذه هي المشكله

وبالنسبه لجملة الفيلم التي ذكرتيها عن عبادة الله عن حب وليس خوفا من النار كنت قد أنزلت قصه بين عابد ومجنون بخصوص هذا المفهوم
رغم اني اؤيد ان نعبد الله عن حب خالص مقترنا بخوف من عقابه

دايما يا اليس تعليقاتك جميله وفيها اضافه للموضوع
بارك الله فيكي وزادك لله قربا ولعباده حبا
دمتي بكل خير

ahmed_k يقول...

متمرده

اهلا بكي صديقة جديده للمدونه

فعلا من يقدم تلك الأعمال يعتقد ان جميع المشاهدين من السذاجه بحيث سوف تنطلي عليهم كل حيلهم
ولكن هناك فعلا من يتأثر بشكل أعمي بتلك النماذج وهؤلاء هم فاقدين القدوه والمثل الأعلي

وتذكرت بهذه المناسبه موقف حصل معي فقد كنت اشاهد احد افلام الأكشن مع اخي الصغير وشاهدت نظرة قلق في عينه علي مصير البطل الذي كان في موقف صعب
فداعبته قائلا يا ابني متصدقش اللي بيحصل ده تمثيل واراهنك انه مش حيحصلو حاجه وفعلا حدث ما قلته له
فتبسمت وقلت له (المخرج عايز كده)

نورتيني وارجو ان تكوني دوما علي تواصل
*******************************************************

كاميليا

اهلا بكي ومرحبا دوما
وربنا يبارك في ايهاب اللي عرفنا علي اخوات عزيزات كحضرتك

تجولي كما تريدين البيت بيتك
وانا في انتظار رأيك في مدونتي المتواضعه

وشكرا جزيلا علي المرور الجميل

إيما ( أم البنين) يقول...

يا سيدي الفاضل هذا هو معظم ما تقدمه السينما للأسف أفكار سيئة في صوره براقة تجعلك تتعاطف مع الشر وتزينه للناس ولو أستغلت السينما بطريقة صحيحة لأمكنها التأثير في نفوس شبابنا وشباتنا وحتى أولادنا الصغار ..

أشكرك على الواجب الجامد ده وسأقوم به قريبا إن شاء الله ..فلقد كتبت تدوينه كان لا بد من كتابتها ..إن شاء الله تزورني وتقرأها
تحياتي

ahmed_k يقول...

ورود واشواك

بفرح جدا لما بشوف تواصلك الدائم
وبتعليقاتك الجميله والقيمه

الحب احساس نبيل لا يجب ابدا ان ننزله منازل المتعه المحرمه
وهذا ما تفعله بعض الأقلام الخبيثه وبكل المكر
انتي المفروض ورود ورياحين مش اشواك
انا مش شايف فيكي اي شوك
ربنا ميحرمنيش من طلتك دوما
دمتي بكل ود
صح ايه اخبار القطاقيط؟
********************************************************

جني

بارك الله فيك
أوجزت اخي الكريم كل القضيه في جمله واحده

وهذه رسالة الاعلام الفاسد والمثير للغرائز

اشكر لك مرورك الجميل
ودمت بكل خير

*******************************************************

cairocomputer

يسعدني دوما المشاركه عندكم
جتي بدون ازاعة الأسم فالهدف هو المشاركه فقط وليس شيئ آخر

وتقبلوا خالص تحياتي

ahmed_k يقول...

غير معرف

با اخي انت لم تصلك رسالتي بشكل صحيح
فأنا لم اهاجم السينما بشكل عام ولا اظهار جوانب الشر في المجتمع
بل هاجمت طريقة العرض التي تجعل المشاهد يتعاطف مع جانب الشر في الفيلم
أو اظهار جانب الشر وكأنه جانب الخير
بدون مراعاة لقيم أو لحرمات
واعتراضك علي الأخ سعودي أكتفي برده هو عليك

وسورة يوسف ليس فيها كما قلت خياته زوجيه كما قلت (ارجو منك استيعاب السوره جيدا قبل التحدث بخصوص كلام الله)
هي قصة حياة نبي الله وما فيها من حكم وتعليم لنا
وقد اظهرت عاقبة محاولات زوجة العزيز ولم تجعلنا نتعاطف مع فعلتها ابدا
بل اظهرت محاولاتها علي انها فعل منبوذ وممقوت وقد ندمت هي نفسها علي تلك المحاوله

شكرا لزيارتك
بس ياريت لو زرتنا مرة اخري تكون باسم معلوم وليس مجهول

****************************************************

سعودي رومانتك

أشكر لك أخي العزيز ردك المهذب والراقي علي غير معرف
وأتفق معك في كل ما قلته

بارك الله فيك عزيزي رومانتك
ولمرورك وقع حسن في نفسي

دمت بكل خير

ahmed_k يقول...

أليس في بلاد العجائب

كلمات الشكر لا تفي ما تفعليه
من تواصل جميل ومفيد وقيم

أعزك الله
اتفق معكي في كل ما خطته اناملك

وقد اكتفيت بردك ورد أخي سعودي في عدة نقاط من مداخلة غير معرف

وكما قلت لكي سابقا
البيت بيتك علقي كما تشائين
وردي كما تشائين

وشكرا جزيلا لمرورك الصحي والجميل هنا

دمتي بكل خير

********************************************************

جني

هنأك الله بأجازتك

بس يا ريت متطولش غيبتك عنا

دمت بكل خير

*******************************************************

ahmed_k يقول...

ايما ام البنين

فعلا للسينما مفعول السحر في تأثيرها
ٌٌفأن احسن استغلالها كان لها وقع حسن في اثراء المجتمع والنهوض بفكره وقيمه

الا تحدث بعض الجرائم بتأثير منها
فقد يقلد شخص ما جريمة معينه حدثت في أحد الأفلام
وقد ينصلح حال آخر بتأثير من فيلم معين

فهي سلاح ذو حدين
وفي انتظار حل الواجب
بس خللي بالك كل ما تتأخري كل ما الدرجه بتنقص
وممكن تدخلي كده دور ثاني هههههههه

وحاضر
الي مدونة ايما فوراً

دمتي بكل ود

غير معرف يقول...

حاجه غريبه
اولا لماذا لا نتعود ان نرد على الفكره بصرف النظر عن قائلها؟
ثانيا الم تصف سورة يوسف بالتفصيل موقف الأغراء عندما هم بها وهمت به وشدت قميصه...ابعد هذا تجسيد للموقف؟ ...هل تقراون صوره مختلفه؟واذا كانت عن ظلم يوسف وليست عن الخيانه الم تهم به حبا امراه متزوجه؟ان لم تكن هذه خيانه فماهى الخيانه ليست مجرد حب ولكن شبه عملية اغتصاب ...هل انتم ملكيين اكثر من الملك ...ربنا يعلمكم كيف تنظرون الى الواقع بكل ما فيه والا اطلقنا على افلام الخيانه افلام عن الظلم ونخلص

أليس في بلاد العجائب يقول...

اعوذ بالله من شرور انفسنا و سيئات اعمالنا

يا غير معرف .. كويس بجد انك غير معرف علشان دا وصف لحالك ...

عندما تتكلم عن سورة في القرآن الكريم واجب عليك يا اخي ان تتأدب مع الله .. فانت تتحدث عما انزله الله و حفظه و جعله كلامه للناس كآفة

و عليك بالتأدب ايضا عندما تتحدث عن نبي الله يوسف عليه السلام بأن تقول سيدنا يوسف او النبي يوسف علي اقل تلفظ به أدب عن نبي له مكانة سيدنا يوسف عليه السلام ..

مين باه اللي بتتكلم علي قصته بالطريقة دي ؟؟ انت هتعمل زي يوسف شاهين لما عمل المهاجر و ال ايه محاكاة للقصة ؟؟

نتكلم بالعقل بلاش عواطف ليها علاقة بالدين خلينا ناس عاقلين مش متدينين (اللهم يا مقلوب القلوب ثبت قلبي علي دينك )

بص يا غير معرف :

ربنا قال عن السورة دي في اول السورة دي : نحن نقص عليك احسن القصص ..
هي فعلا السورة في محتواها قصة سيدنا يوسف عليه السلام ..

بس تخيل الله عز و جل ينزل سورة في كتابه الكريم علشان يصف فيها مشاهد ياخدها مخرج من بتوعك زي ما بتقول؟؟
اعوذ بالله جل سبحانه و علي علوا كبيرا عن كل ما تقول..

صحيح فيها وصف لما حدث من سيدة ذات حسب دعت شاب وراودته عن نفسه .. ألم تقرأ تفسير الأيات ؟؟ أم تركت خيالك يصور لك تفسير تميل اليه نفسك ؟؟

مين اللي بتتكلم عليهم في تعليقك التاني دول؟؟ مشهد اغتصاب و دفعته و مين دا اللي فكر كبشر ثائر؟؟

انت بتتكلم عن مين يا غير معرف ؟؟

حاشا لله ان تكون تتحدث عن نبي الله يوسف فقد قال الله عنه " وراودته الذي هو في بيتها عن نفسه " هي اللي راودته و اشتدت الاغراءات من حوله ..
" قال معاذ الله انه ربي احسن مثواي إنه لا يفلح الظالمون" هل دي بتساوي عندك انه بشر ثائر؟؟؟؟

نبي الله استنجد بالله واستعاذ به مما هو فيه.

" ولقد همت به و هم بها لولا ان رأي برهان ربه " الهم حديث النفس و قد تفعل و قد لا تفعل ( تفسير الشيخ الشعراوي عليه رحمة الله)

مراودة منها و ممانعه منه .. لولا : حرف امتناع لوجوب .. يعني محصلش .. يعني المشهد اللي دار في خيالك دا كله كلام فاااااااااااااضي ..

حاشا لله ان يكون الله قد قال في كتابه الحكيم كلام زي دا .. اراد الله ان يقول ان يوسف الشاب اليافع الذي بلغ أشده .. رفض وامتنع علشان العفة والحياء وعلشان ربنا عايزه يكون مثل لكل شاب يحتذي به في ان يعف نفسه و يرفض الاغراءات مهما بلغت شدها ..

ألم تسمع قول رسول الله صلي الله عليه و سلم عن السبعه الذين يظلهم الله بظله يوم لا ظل الا ظله

**عن أبي هريره رضي الله عنه,عن النبي صلي الله عليه وسلم قال(سبعه يظلهم الله فى ظله يوم لا ظل إلا ظله:إمام عادل,وشاب نشأ فى عبادة الله تعالي,ورجل قلبه معلق بالمساجد,ورجلان تحابا فى الله,اجتمعا عليه,وتفرقا عليه,ورجل دعته امرأه ذات منصب وجمال,فقال:إني أخاف الله,ورجل تصدق بصدقه,فأخفاها حتي لا تعلم شماله ما تنفق يمينه,ورجل ذكر الله خاليا ففاضت عيناه))..
صدق رسول الله صلي الله عليه وسلم...

و نبي الله يوسف كان يخاف الله .. و كان مثال يحتذي به لشاب الدنيا كآفة وليست قصة فردية مليئة بالصور التي جالت في خيالك ..

اتق الله فيما تكتب فسياتي يوم تشهد عليك يداك بما كتبت ..

في كلام كتير اوي يترد بيه علي قولك دا بس ارجو ان تراجع كتاب الله و تقرأ تفسير السورة بنفسك و تستفتي قلبك و ادعو الله ان يثبتك علي الحق :)

واعتذر مرة اخري لو اطلت في الكتابة :)

أليس في بلاد العجائب يقول...

اعتذر يا احمد معلش انا بقالي شوية كتبت و توقفت مكنتش اعرف انك رديت عليه ...

عذرا :)

ahmed_k يقول...

اليس

والله لو كنت اطلعت علي ردك قبل كتابة ردي لما كتبته
بارك الله فيكي
كلماتك تلجم
وفيها من العلم والإفاده الكثير
ربنا يكثر من أمثالك
ولا يحرمني من تواجدك دوما

ahmed_k يقول...

سأكتفي برد اختي اليس على غير معرف
لذلك حذفت ردي
لأنه ليس بكفائة رد اليس

بارك الله فيها

Saudi Romantic يقول...

السلام عليكم


ليس لدي ما اكتبه كتعليق في هذا

الموضوع فقد إكتفيت بتعليقين هنا..

ولكني اكتب هذه الكلمات فقط لأحيي

أخي العزيز والمحترم(( ahmed_k ))

ولأحيي الاخت الكريمه

(( أليس في بلاد العجائب ))

انت تعرفني يا اخي احمد وانا اعرفك

ايضاً..لكن الاخت الكريمه لم اعرفها الا

من خلال موضوعك الجميل هذا..

وقد اعجبني جداً ردها الرائع من خلال

التفسير المقدم لسورة يوسف..

واقول لها جزاك الله خير واكثر من امثالك

ويارب تروحي للعمره في اقرب وقت إن

شاء الله..


كلمتين اقولها لكم اخوتي الكرام

(( ahmed_k ))
(( أليس في بلاد العجائب ))

أنا سعيد جداً بفراءة ما تكتبون .

في امان الله

أختكم فى الله يقول...

موضوع فى منتهى الاهمية والله يا اخى جزاك الله خيرا ..

مع الاسف هى دى المخططات اللى اليهود بيحاولوا بنفذوها عندنا من زمااااااان ينشروا بيها الرذيلة والافكار المخالفة لديننا

دعاء مواجهات يقول...

انت قولتها بنفسك سينما فى سينما

يعنى اى حاجة فى اى حاجة

الناس ردو مش عبيطة وفاهمين كويس حتى لو اتعاطفوا

المشكلة ف الاجيال اللى طالعة بجد ربنت يستر عليهم

تحياتى للبوست الجميل


..

جـود الحـزن يقول...

مرحبا...

موضوعك يلامس جرحاً غائراً لايندمل...
ليس فقط في السينما المصريه..
ولكن حتى مسلسلاتنا الخليجيه قبحهم الله..
يرسمون لنا الانحلال الاخلاقي.. ويدعون الى الفسق والمجون... ثم يدعون انهم يضعون حلولا لها..اي حلول في غياب الوازع الديني...اي حلول للتي تحمل سفاحاً ثم ترمي ابنها عند حاوية قمامة..
اي حلول للتي تغازل الشباب ثم تنجرف معهم في الحرام..
لقد سئمنا تلك المشاهد تتكرر علينا في شهر رمضان المبارك..
نصوم بالنهار ونتابع المسلسلات الخليعه في الليل...

اعذرني اخي احمد كلام كثير اختصرته في هذه الكلمات ..
اشكرك لكنك جعلتني اتنفس من خلال صفحاتك..

دمت اخي العزيز

nonni يقول...

الموضوع حلوووو اوى و فعلا كان محتاج مناقشة و الحكاية للاسف مبقتش افلام سينما بس دى بقت كمان الاغانى اللى هى الفيديو كليبات يعنى , الغريب ان الحاجات دى بتحقق اعلى ايرادات فانا فى راى ان الافلام و المواد الاعلامية دى احنا اللى بنخليها تنجح و احنا برده نقدر نخليها تفشل انا بقيت الصراحة اشمئ\ انى اتفرج على اى حاجة من الحاجات دى حتى السينما الواحد مبقاش يروحها.

"تحياتى"

appy يقول...

اسم الفيلم حاجه والكلاب ههههههههههه مش فاكره
على فكره كنت كتبت بوست عن الخيانه هو عباره عن اسئله

اسمع هتقوولوا الحقيقه ولا هااااا ادخل شوف التعليقات
ووانت تعرف المجتمع اللى احتا فيه

وعموما ان راى ان مفيش سينما فى مصر الا قليل
واكتر حاجه بعيد عن السينما
مسلسل ونيس اللى بيرجع للاسره القيم بتاعتها

ahmed_k يقول...

سعودي رومانتك

انا والله اللي بأسعد جدا
بوجودك وطلتك وتعليقاتك هنا

ربنا ما يحرمني ابدا من ذوقك وكلماتك
الجميله التي لها وقع طيب جدا في نفسي

بارك الله فيك أخي ودامت الأخوه في الله بيننا دوما

في امان الله

*******************************************************

أختنا في الله

موجوده كل مخططاتهم في بروتوكولاتهم
وطبعا موضوعه لمصلحتهم
ولكن ما هي ردة فعلنا احنا

مروك جميل وكلماتك طيبه

دمتي بكل خير

*****************************************************

دعاء مواجهات

أنا مش مصدق نفسي دعاء بنفسها هنا
يا مرحبا يا مرحبا
طولتي الغيبه
من بوست السادات منورتيناش
يا ريت متحرمش من طلتك دوما

وأضم صوتي لصوتك
ربنا يستر علي الأجيال القادمه

دمتي بكل خير
**********************************************************

جود الحزن

الظاهره ليست خاصه ببلد معين
هي يا اختي ظاهره عربيه عامه
ولكن يوجد بالفعل بعض الأعمال القيمه
كمسلسل نمر بن عدوان
والذي تابعته طوال رمضان الماضي
وانا معك فعلا في رمضان بتكثر ظاهرة المسلسلات والتي غالبا بتكون اعمال
كلها هيافات
يعني نصوم النهار ونبوظ صيامنا ليلا

لا كمان في مسلسلات بتتعاد خلال النهار
يعني منلحقش نعمل اي حسنات بالنهار

ربنا يستر علي امتنا
مرورك طيب وجميل
كوني هنا دوما
في امان الله
*******************************************************
nonni

معاكي حق كل ما يسمي بالفن اصبح هابط هذه الأيام
وبأعتراف العاملين في المجال
واصبح العائد المادي هو الهدف
وليس تقديم عمل ذو قيمه
كما كان يحدث في الزمن الجميل
وكما قلتي احنا باقبالنا علي تلك الأعمال نقدم تاشيرة مرور لكل تلك الأعمال الهابطه
سعدت جدا بمرورك الجميل
ودمتي بكل خير
********************************************************
appy

ازيك منوره الشاشه ال14 بوصه اللي عندي والله
ليه محلتيش الواجب لغاية دلوقتي
حتاخدي ملحق
ومليش دعوه وتدخلي دور تاني
والواجب اللي حلتيه مش تبعي خااااالص
هههههههه

وانا معاكي في مسلسلات وكمان افلام لها قيمه وبتناقش قضيه في المجتمع
مش ونيس فقط في من ده كتير
ومحمد صبحي من الفنانين المحترمين (في الغالب)واللي اعماله تشبه لحد كبير الزمن الجميل ,وخصوصا في مسرحه

نورتيني واسعدتيني بتعليقك الجميل
ومتحرمش من دوام طلتك

في امان الله

الشنكوتي الكبير يقول...

غلبت اقول الكلام ده يا ابو حميد

السينما عندنا دايما تظهر فيها الخاينه لزوجها هي عاشقه لا تحمل اي شر والزوج وحش كاسر

الحرامي والمرتشي غلبان

الزاني والفاسق روش وشقي حبوب
الكذاب لبق
الكافر متحرر ومتقدم

وكتييير زي كده وكأننا لا نملك عقل نرد بيه على هذا المفهوم او المفاهيم الخاطئه دي كلها

عموما سيظل الشيطان يحكمهم ويقودهم كالنعاج وعلينا الا نتبع النعاج

سلاااااااااااااااااااااااام
اخوك ايهاب

ahmed_k يقول...

الشنكوتي الكبير

منورني يا هوبه
ان شاء الله دايما يا رب
معك كل الحق مفاهيم كتيره الأيام دي بقت مغلوطه
ربنا يرحمنا من كدا أفلام

ومتألق دوما يا هوبه

دمت بكل ود