الأحد، 18 أبريل 2010

أحنا والبركان

السلام عليكم ورحمة الله

أول أمس ألتقيت بأحد الأصدقاء ... فوجدته حزينا مهموما
- مالك يا صاحبي
- أنت مسمعتش عن بركان ايسلندا
- آه سمعت ... وماله ؟؟؟
- سببلنا مشكله
- ليه لسمح الله أنت عندك ربو ؟؟؟؟
- ههههه ربو ايه بس ....أثر على شغلنا ووقف حالنا
نسيت أخبركم ان هذا الصديق يعمل مدير فرع لإحدى شركات السياحه ...وقد كانت لهم حجوزات عديده مع شركات سياحيه فرنسيه .... وتم إلغاء الحجز بسبب وقف الرحلات الجويه بسبب الغبار البركاني الذي ملأ سماء أوروبا .
يعني هما يحصلهم أزمة إقتصاديه أحنا نتأثر
وهما ينفجر عندهم بركان وبرضو أحنا نتأثر !!!!
عارفين ليه ؟؟
لأننا أصحاب إقتصاد هش .... إقتصاد أغلبه إستهلاكي أو خدمي
فالسياحه لقمة في يد غيرنا .... نعم في يد من يرسل السائح
لذلك هم يصابون ... فنتداعى لهم نحن بالسهر والحمى
نحن نصاب .... فلا تهتز لهم بضع شعيرات ...جايز لأنهم قرع ؟؟.
نحن من فعلنا ذلك بأنفسنا عندما جعلنا السياحه أحد الركائز الرئيسيه للإقتصاد الوطني ..ويا ليتنا إمتهنا السياحه بحرفيه عالميه حقيقيه ...
فإسرائيل المزعومه رغم ما فيها بها سياحه أكثر مما لدينا
وتونس بها سياحه من الطراز الأول عالميا ....إلخ
لكننا أمتهناها خطأ ... ظننا أن السياحه فقط منتجعات سياحيه ومنشآت خرسانيه فقط للأجنبي ويحرم منها المواطن ،فسعر الإقامه للأجنبي أقل بكثير مما قد يدفعه المواطن لو أراد الإقامه بإحدى تلك المنتجعات السياحيه .
إمتلأت شواطئنا بمنتجعات ومنشآت سياحيه أفقدت شواطئنا جل جمالها ... ولم نجعل منفذ للمواطن يرى البحر من خلاله .... ولو وجد فإما شاطئ سيئ لا يصلح أو له بوابة رسوم (ادفع تدخل ) .
السياحه من البيئة المحليه فنحن نملك موروثا حضاريا ضخما لولاه لما سمع ولا اهتم العالم بمنتجعاتنا السياحيه أوشواطئنا السياحيه .... فهذا فقط هو ما تم إستغلاله بشكل شبه حقيقي ، وهو موروث لا يد لنا فيه (رحم الله الفراعنه )
ولكننا بجواره دمرنا الطبيعة الساحره بكم من الخراسانات التي في أي أزمة طفيفه تكون خاوية على عروشها وكلها من أموال هذا الشعب ومن مدخراته البنكيه ....
السياحه ليست فقط واجهه ومنهج يدرس للتلاميذ في المدارس ،
السياحه فن العرض والطلب ....فتسويقنا السياحي سيئ يعتمد فقط على السعر وغفل عن المضمون والفروق التي تميزنا عن الكثير من الدول المنافسه ،
فالسياحه ثبات سعر وليس عند كل رجه نهبط بالأسعار بالحد الذي يجعل إسبوع هنا شامل الإنتقالات والوجبات يساوي سعر بدله في لندن !!!
السياحه أن نخبر السائح انه ببلد ذو ثقافة وعادات ودين وعليه ان يراعي ذلك وليست مسخا من بلادهم في العادات والتقاليد...فهو قد ترك بلده ليستمتع بطبيعتنا وبموروثنا نحن لا ما إستوردناه من بلاده وياليتنا طبقناه كما يطبق ببلاده .
ونسينا أو تناسينا أننا بلد قامت حضارته وتاريخه على الزراعه التي هي أهم مميزات القطر المصري في السابق التي أهملت وأصبحت في ذيل الإهتمامات رغم أنها كانت في يوم ما عصب الإقتصاد المصري وللأسف اليوم (طويل التيله.. تيلته قصرت)
وهاهو البركان مازال ينفث غباره في الجو والأنباء تعلمنا أنه قد يستمر ثورانه لأيام أو لأشهر قادمه (هنا)
فماذا عسانا نفعل لو حدث ذلك ؟؟؟؟؟
لله الأمر من قبل ومن بعد

هناك 28 تعليقًا:

صيدلانيه طالعه نازله يقول...

احنا كل حاجه عندنا هشه مش الاقتصاد بش
كل حاجه عندنا سايبنها ماشيه بالتساهيل
نظام قول يا باسط تلاقيها هاصت

البركان لو استمر حيبقى ليه مشاكل كتيره غير مشكله السياحه و برضه حنتأثر بيها
ان اجلا او عاجلا

reem يقول...

موضوع جميل وبجد فعلا اقتصادنا هش

وعجبنى جدا ما قلته ان السائح محتاج يجى يشوف حضارتنا احنا وعادتنا احنا

لكن احنا دلوقتى لما بنروح اى منتجع سياحى بنحس اننا مش في مصر ولا دى تقاليد ولا عادات مصر وبنحس اننا مسخ منهم

ربنا يستر علينا بجد
وفعلا لله الامر من قبل ومن بعد

تحياتى ليك ولموضوعاتك الجميلة دايما

ندى الياسمين يقول...

عارف حضرتك بوذا

بوذا اه

وانت فى الهند ولا فى الصين فى اي معبد بوذي
لو فى تمثال لبوذا ممنوع حضرتك تديله ظهرك

لو عايز تمشي من المعبد لازم تمشي بظهرك

وشوف مره مذيعه بتقدم برنامج هناك وعشان تبص للكاميرا جابت مرايه ووقفت ظهرها للكاميرا الى بتصور وشها فى المرايه

احنا بقى
بنفتح لهم المساجد يعملوا فيها بلاوي بدعوى انها مساجد تاريخيه ومزار سياحي

طول ماا حنا مش بنحترم نفسنا ما حدش هايحترمنا

وعموما مش السياحه بس الى ما بنعملهاش صح
كل حاااااااجه اصلا بتتعمل غلط

الشنكوتي الكبير يقول...

يا ابو حميد
بيقولك ان احنا من اقوى الأقتصادات في العالم وده ليه لأن الفشله والطماعين بيقطعوا فيه من سنين ومع ذلك لسه عندنا حاجات كتير مقدروش يحرقوها
وبالتالي بقى لسه فيه امل الدنيا تقوم
برغم كل اللي احنا فيه ده ولسه عندي امل ان البلد دي تتصلح بس المهم نلحق دلوتي لأن ممكن تأخير اكتر من كده منلحقش حاجه خالص

ربنا ينجينا يا ابو حميد

اما سحابة اوروبا يا سيدي هي جت على دي لو اوروبا جالها دور انفلونزا بنموت احنا قبلهم يا ابو حميد


سلاااااااااااااااااااااام
اخوك ايهاب

طوبه فضه وطوبه دهب يقول...

عايزه احييك على جمال هذا الموضوع واهميته فحقا نحن من سحقا بكل شىء وبخسنا بانفسنا حتى وصلنا الى ما نحن فيه ولن ننصلح حتى نصلح من انفسنا وبحييك برضو على موضوع المسجد المهجور بجد نزل دموعى اكثر من رائع سلمت يداك وكتاباتك

ahmed_k يقول...

صيدلانيه طالعه نازله



فعلا أمور كثيره ماشيه بالبركه
ونسأل الله أن يرحمنا من تبعات هذا البركان او غيره من المظاهر الطبيعيه

منوره بتواجدك ومتابعتك الدائمه يا دكتوره
تقبلي خالص تحياتي وتقديري
********************************************
reem



بيحاول لدينا القائمين على السياحه توفير جو ترفيهي للسائح بحيث يشعر بالتمتع وفقط وتلك نظرة خاطئه,
فأولا هما قد يطلعلهم قرون
ثانيا سر السياحه في الفرق بين بلداننا وبلدانهم وليس التقليد

منوره صفحتي دايما يا فندم
تقبلي أخلص تحياتي
*******************************************
ندى الياسمين



كلامك جه الجرح فعلا يا أم خالد
فبوذا يحترم من أتباعه لذلك أستوجب أن يحترم من زواره رغم أنه صنم لا يضر ولا ينفع لا حول ولا قوة إلا بالله
أسعدتيني بمرورك الثري يا أم خالد
في أمان الله
********************************************
الشنكوتي الكبير



هههه فعلا على رأيك
البلد بتتنهب منذ قرون ولسه عايشه
وصدقت مازال الأمل في الله كبير
وقادر سبحانه على تعجيل الفرج
منورني يا هوبه ومتطولش الغياب تاني
في أمان الله
*******************************************
طوبه فضه وطوبه دهب



بارك الله فيكي يا دكتوره
فينطبق علينا القول
هذا ما جنته علي يدي
لو لم نهتم بحرفية إقتصادياتنا فلا أمل
وأشكرك على رأيك الجميل في البوست السابق
منوره يا دكتوره كعادتك دوما
في أمان الله

همس الاحباب يقول...

سبحان الله بالرغم من ان اقتصادنا هش
لكن لنا الاف السنين ننهب ونسرق ومع ذلك لسه فيه خير فى البلد دى
مع الاسف المنظومة تاسست على فساد وغش وانظمة فاسدة تخطط لها فقط
ربنا يستر
تحياتى

ميرا ( وومن ) يقول...

موضوع هايل فعلا يا أحمد أحييك عليه

وفعلا عندك حق اللي بستغربلة اننا بنسيب السياح يتصرفوا براحتهم

من كام سنة كنت شغالة في مجموعه شركات بتدير فندق وكذا شركة في بعض وكنت موجودة في الفندق مع دخول جروب اسباني وتقريباً معظهم أستفسر عن الحجاب وإذا كان في لبس معين المفروض يلبسوه ولا لا ؟؟

ومعظم الولاد اللي كانوا في الجروب كان عاجبهم قوي الحجاب وفاكرينة الزي الرسمي بتاع البلد

نفس الشئ تقريباً اتكرر في اخر معرض حضرتة مع شركتي وكان في كذا مندوب اجنبي من الشركات اللي بنتعامل معاهم كانوا معجبين بالحجاب وشكلة

وقالوا انه بيظهر ملامح الوجه أكتر

يعني هما متوقعين بما اننا متحفظين في لبسنا من وجهه نظرهم هانطلب منهم ده وشكلهم كان مرحب

طب ليه احنا مش بنعمل كدة واللي عاوز يجيلنا يحترم عاداتنا وتقاليدنا

ماما أمولة يقول...

لله الأمر من قبل ومن بعد

يقال ان السحابة ستزور مصر اليوم

ربنا يستر يارب ويخيب ظنهم

تقديري لك يا أحمد

عمرو جويلى يقول...

السلام عليكم
واللهيا أحمد كل
حاجه عندنا بقت
هشه وسادت بيننا
ثقافة الإعتماد على الغير
ربنا يلطف بينا
خالص تقديرى

نهــــــــــار يقول...

السلام عليكم ورحمة الله وبركاته...
لابد ان يكون التأثر عالميا لأن اوروبا من أهم القوى المؤثره في العالم وتأثرها طبيعي يؤثر علينا ..
والله يصلح الأمور..
...
دمت بخير

نهــــــــــار يقول...

السلام عليكم ..
أخي ابو القاسم
بس حبيت اوضح إن تعليقي كان عام عن كل دوله تهتم بالقطاع السياحي ..
..
أما جانب السياحه المصريه فأتركه لأهل الخبره ..
..
خارج الموضوع ..
يعني الأسعار نزلت اليومين دول في مصر ممكن أنزل أصلها وحشتني ...
...
وأعذر تقصيري معك ...
في أمان الله أخي

akeed يقول...

للاسف هشة و ذلك لانه لا يوجد هدف لنا سوى تجميع اكبر قدر من النقود و الاستهلاك .


فيجب ان تتغير العادت لكى يتغير النظام الاقتصادى

ويكيبيديا الإخوان المسلمين يقول...

السلام عليكم ورحمة الله وبركاته
ويكيبيديا الإخوان المسلمين الموقع الرسمي الرابع لجماعة الإخوان المسلمين .
http://www.ikhwanwiki.com

الموسوعة الحرة التي يستطيع الجميع تحريرها وهى تسع جميع الآراء ( السياسية – الاقتصادية – الشرعية – التنموية - ....وغيرها) .

وإهتماماً منا بدور المدونين البارز في علم الإنترنت تم تخصيص قسم خاص بالمدونين على الموسوعة هو قسم " مدونون ومدونات " .

سجل الأن وأنشىء صفحة خاصة بمدونتك على الموسوعة في قسم " مدونون ومدونات " يعرض بها جميع ما تحرره من مقالات ومشاركات .

معنا تستطيع نشر أفكارك ومقالاتك ليقرأها أكبر قدر ممكن من القراء والباحثين فالموسوعة تعد مصدراً كبيراً للبحث العلمي.

وقد يتم ترشيح مقالتك لتكون مقالة مختارة على الصفحة الرئيسية للموسوعة .

فى مجتمع الويكيبيديا يمكنك التواصل مع عدد كبير من المستخدمين والمدونين والكتاب المشهورين .

شاركنا من أجل الإفادة والإستفادة .

لمزيد من المعلومات عن كيفية الإشتراك في الموسوعة وإنشاء صفحة خاصة لمدونتك يرجى زيارة الموسوعة والإطلاع على قسم مدونون ومدونات .

http://www.ikhwanwiki.com

(أم البنين) يقول...

جزاك الله خيرا
اللي محتاج سياحة وترفيه علشان ينسى همومه هو المواطن المصري مش السياح
نسأل الله أن يحفظ مصر وأهلها ويرفع عنهم كل سوء
جزاك الله خيراعلى المقال وبارك الله في قلمك

hagazy يقول...

لنا الله يا ابو حميد ومن يتوكل على الله فهو حسبه ، أشكرك على موضوعك الرائع واتمنى لمدونتك الإزدهار
نصر الكاشف

mostafa rayan يقول...

انا متفق معاك من عجائب الامور ان الناس اللي ضحت باجمل سنين عمرها من اجل تحرير سيناء لا تستطيع الان ان تتدخلها او تتمتع بها بينما عدونا يتمتع بها كامل التمتع وكاننا اخرجناه منها ليعود إليها
موضوع موجع
لك كل التحية يا اخي

ahmed_k يقول...

همس الأحباب


خالد باشا منور صفحتي المتواضعه
وكما ذكرت فالفساد لا ينجب إلا فاسدين
ومصر لولا الخير فيها
ما استمرت طوال تلك الأزمنه رغم النهب
ولنا الله

تقبل خالص تحياتي
*****************************************
ميرا


ههههه فعلا يا ميرا كلامك صح
وأنا بستعجب أحيانا من بعض السياح الذين لا يملكون أي ثقافه أو معرفه خارج نطاق بلدانهم
واما بخصوص إستفسارهم عن إذا كان يوجد لبس معين المفروض أنهم يلتزموا بيه ، فتلك مصيبة كبرى لأننا لا نقيد تصرفاتهم بأي شكل
وفي المدن السياحيه تحسي أنك مثلا في هاواي من ملابس السياح ،
أذكر أنه في بداية الثورة السياحيه في الغردقه وضعت لافتات للسياح بمنع الخروج بملابس البحر خارج نطاق الشواطئ
ووجد المسئولين كل إستجابه وإلتزام منهم
أما الآن ولأنه لا يوجد أي رابط بنشوف في الشوارع بلاوي وكأن البلد كلها بلاج
ربنا يعديهاعلى خير
منوره بمرورك كعادتك دايما يا ميرا
دمتي بكل خير
********************************************
ماما أموله


اهلا أهلا منوره يا فندم
والحمد لله لم تزورنا تلك الغمامه
بصراحه مش ناقصه غيوم هههه
أسعدتينا بإطلالتك
دمتي بكل خير
*********************************************
عمرو جويلي


وعليكم السلام ورحمة الله
للأسف في أمور كثيره لابد لها من حل
وخصوصا في الجوانب الإقتصاديه
لأني بشعر أحيانا انه ليس هناك واحد بيفهم في الإقتصاد في مراكز إتخاذ القرار

منورني أستاذ عمرو
دمت بخير
********************************************
نهار


وعليكم السلام ورحمة الله

فعلا يا نهار أوروبا قارة مؤثره في الإقتصاد العالمي ولكننا ننتقد عدم وجود خطط مواجهة الكوارث إلا بعد وقوعها
ويا فندم تنوري مصر وأنتي وحشتيها كما هي وحشتك
والأسعار مبتنزلش إلا في النوازل المحليه(حمانا الله منها) لكن أمر كهذا لا يؤثر في الأسعار
لأنها عرض طارئ عالمي وليس محلي
وغير كده الأسعار بتهبط على نظام الجروبات الشارتر التي تتم عبر شركات السياحه
والأسعار يا نهار مهي أصلا قليله مقارنة بدول اخرى منافسه
بس أنتي شدي حيلك واقنعي الأسره بالقدوم لمصر ومتقلقيش ههههه
تنوري صفحتي في اي وقت يا نهار
دمتي بكل خير

ahmed_k يقول...

akeed


فعلا والله أخي الكريم
تتغير العادات والثقافه الإقتصاديه حتى يتغير النظام الإقتصادي
أسعدتني بمرورك اخي الفاضل
دمت بكل ود
******************************************
ويكيبيديا الإخوان المسلمين


أشكركم أخوتي الأفاضل على الدعوه الكريمه وبإذن الله اشارك بمدونتي في الموسوعه
تقبلوا خالص تحياتي
******************************************
أم البنين



فعلا أحنا محتاجين للسياحه وللتعرف على بلدنا بأكثر من الأجنبي
بس نعمل أيه في التعطش الدائم للعمله الصعبه والذي لا ينتهي
أسعدينا بواصلك ونرجو دوامه
دمتي بكل خير
*********************************************
hagazy


بارك الله فيك أخي نصر
فمرورك في مدونتي مصدر سعادة لي غامره
وكما قلت ( لنا الله)
تقبل خالص الود والتقدير
********************************************
mostafa rayan



فعلا والله معاك حق يا مصطفى
فهم يمرحون في سيناء كما يحلوا لهم
ولا يطلب منهم تأشيرات دخول إلا عند النفق ، فكل ما قبله مرتع لهم
ربنا يسترها
منورني يا درش
دمت بكل خير

marmar يقول...

اممممممم استاذنا الجميل احمد
ازيك يا استاذنا
يارب تكون تمام

بانسبه لموضوع السياحه انا كنت عايزه اعرف حاجه واحده بس
حضرتك بتقول :
ظننا أن السياحه فقط قرى سياحيه ومنشآت خرسانيه فقط للأجنبي ويحرم منها المواطن ،فسعر الإقامه للأجنبي أقل بكثير مما قد يدفعه المواطن لو أراد الإقامه بإحدى تلك القرى السياحيه .


انا مش عارفه الكلام ده صحيح ولا لا
اصل انا لما رحت شارم قبل كده
لقيت كل حاجه ف القريه اللي كنا قاعدين فيها سعرها للمصري اقل بكتيييييييييير للأجانب
يعني على سبيل المثال الاكل
كان له تسعيره خاصه للمواطن المصري
وتسعيره مضاعفه للأجنبي


كمان بالنسبه اننا امتهنا السياحه بالشكل الغلط مين قال كده ده انا قاريه ف جرنال الاهرام لما كنت ف مصر
ان السياحه في 2008 كانت تقدر بحوالي
8 مليار جنيه او 18 مليار
هوا يمكن مفيش منهم قرش دخل للشعب
بس مش عارفه ايه الحل

بسنت يقول...

احنا بنميل لتبعيد مش الانفراد
والتقدم بنفسنا عادى على فكره دا مش منهج دوله بس دا منهج حتى اقل موظف عندنا الوحيدين اللى شغلهم تمام هو القطاع الخاص الى الدقيقه تفرق معاه

وبالرغم ان السياحه قطاع خاص اكتر لكن سياسه الاعتماد على الاجانب والتذل لفلوسهم- انا شيفاها كدا منتهى الاهانه الصراحه- مع العلم لو شجعنا السياحه الداخليه مصر اللى هتستفيد فعلا - والسياحه العربيه
اللى اغلبهم بيسافر لبنان مثلا واوروبا فمصر بتاريخها وسياحتها الجباره عى الاولى
ولكن تقول لمين وفيها ناس عايزه تفقرها فعلا علشان نفضل نعتمد على الاجانب فى كل شئ

الواحد خلاص تعب فعلا من الفساد دا
يعنى تخيل هنا فى الصعيد فى بلدتى ناس لا تعرف شئ عن البحر غير ما تراه فى التليفزيون دول ذنبهم فى رقبه مين انه حرمهم من مجرد رؤيه البحر لضيق ذات اليد وغلا الاسعار وتوفير المواصلات او رحلات مخفضه كتشجيع اى شئ لحسن النوايا
لكن هقول ايه يا الف خساره

بسنت يقول...

بالنسبه للاقتصاد لو تفتكر بعد الازمه الاقتصاديه العالميه وكلام المسئولين - اضلاع الفساد
ان مصر عبرت الازمه على خير
مش عارفه اى خير وكثير من المشروعات صفت عمالتها المؤقته سواء فنادق او شركات مش عارفه كانوا عايزينا
نترفد كلنا علشان نبقى ما عدناش الازمه

الاقتصاد لا اعتقد ان القائمين فى الحكومه يعرفوا معناه اصلا يعنى فى دراسات ممتازه بدايه من طلعت حرب حتى
الجيل السابق لحفظ الاقتصاد وتقويته لكن طبعا اى حد يفكر يعبر عن الموضوعات دى او يثيرها بيكون مصيرها كلنا عارفينه لان هما عايزين البلد تفضل كدا بدون اى قاعده واساس تتحمل عليها مستقبلا
للاسف كثير من المسئولين فى مواقع لا يستحقونها

معذره للاطاله
كل التحيه

جنّي يقول...

السلام عليكم

كيف حالك اخ احمد لعلكم بخير والحمد لله ..

للاسف يا استاذ احمد ليس السياحة فقط بل كل اقتصادياتنا وثقافاتنا وادبياتنا لا تقوم الا على العشوائية بلا تخطيط .. او التقليد الاعمى لأسوأ ما عندهم ..

تحيتي

دندنة قيثارة الوجد يقول...

دردرشة حلوة أوي .. وعلى فكرة في بركان تاني راح ينفجر بس في قلب العالم العربي .. عشان يفقوا بقى!!

تحياتي لك

زهرة(جنى)الاسلام يقول...

السلام عليكم
ندعوكم لمشاركتنا حملة إصلاح الجيل من أجل التحرير .
(حملتنا حملة أفعال مش بس كلام )

ونرجو منكم وضع لوجو الحملة فى المدونة

والتفاعل مع الحملة

ونفع الله بنا وبكم الأسلام والمسلمين
http://forelaqsa20.blogspot.com/

الجواز و سنينه يقول...

موضوع هايل و الله
فعلا احنا زى ما وصفت بالظبط
السؤال اللى فعلا كان مجننى
ان السياح اللى بييجوا عندنا مشهمه السياح الاغنياء
دول بتوع ارخص حاجه
و ازاى ده مش غالى عليهم اتاريهم بياخدوه ارجص مننا
و كمان احنا عملنا اللى علينا و عرفناهم اننا شحاتين و متحرشيين و حراميه و هانسرقم
انا شفت ناس منهم بتفاصل اى و الله بتفاصل
كنت فطسانه على نفسى من الضحك
مهو فاهمنا و البركه فينا و فى اعلامنا بتاع الواد اللى بيترحش بالسايحه
بلا قرف

ahmed_k يقول...

marmar


أهلا بمرمر حياكي الله بعد طول غياب
بصي يا ريم بالنسبه للقرى السياحيه وأسعار الإقامة فيها فما قصدته من تلك الفقره في حالات ان يتعاقد الجنبي مع شركات سياحيه في الخارج ويحمل على تكلفته سعر الطيران والتنقلات
فلو قارناها بسعر الإقامه للمصري سنجد ان المصري يدفع اكثر بكمراحل
أما الأجنبي الذي يحجز مباشرة مع القريه السياحيه فيحاسب بسعر بدون خصومات شركات السياحه
مما يجعله يدفع أكثر من المواطن
وانتي تعلمين أن السياحه في مصر اغلبها تسويق خارجي وليس محلي

وأستغرب من الخبر الذي قرأتيه في الأهرام
فكيف ذلك ونحن تردنا أضعف السياحه في العالم وهي الروسيه والشرق أوروبيه غالبا
ممكن يكون مقصدهم من رسوم التأشيرات ورسوم الدخول التي تفرض على السائحين وتلك لا يستفيد الشعب منها شيئا
ولا يستفيد الشعب إلا من المشتريات المباشره للسائحين

منوره يا مرمر ومنتظر وجودك هنا دايما
في امان الله
****************************************
بسنت



حياكي الله دكتوره بسنت
وأنتي تطيلي كما تشائين
فانا اتفق معك في كل ما اوردتيه
ولدينا للأسف كما ذكرتي قصور في إمكانية فتح المجال للسياحة الداخليه بل والأمر من ذلك تجدين بعض أصحاب القرى يرفض إستقبال مواطنين
ولكن أحيانا نجدهم لديهم بعض الحق فنحن يجب علينا ان نتعرف على ثقافة الترشيد في الإستهلاك
فكثير منا يتميز تواجده بأي موقع بتدميره لذلك المكان واطفالنا يمرحون ويكسرون بدون رقابة أسريه او توعية أسريه بخطأ ما يفعلونه لن الوالدين نشأوا على هذا المنهج
ولكن بالتوعيه الدائمه قد يجدي الأمر نفعا
والإقتصاد لو كان قويا ومخططا بشكل سليم لما ظهرت تلك الآفات الإجتماعيه والتي لا تظهر إلا من المحرومين جدا
نسال الله العفو
منوره يا دكتوره واسعدتني تعليقاتك وآراءك
دمتي بكل خير

ahmed_k يقول...

جني


وعليكم السلام ورحمة الله
أنا بخير حال أخي سعيد
وفعلا صدقت فالعشوائيه مسيطره في كثير من مجالات حياتنا
منورني يا أخي الغالي
دمت بكل خير
*****************************************
دندنة قيثارة الوجد



حياكي الله أختي الكريمه
وأي بركان هذا الذي سوف ينفجر في قلب العالم العربي ؟؟؟
نسأل الله السلامه
أسعدتيني بإطلالتك أختي الكريمه
في أمان الله
******************************************
زهرة الإسلام



يسعدني المشاركه اختي الكريمه بعدما اطلع على فحوى الحمله
وشكرا على الدعوة الكريمه
خالص التحيه
*******************************************
الجواز وسنينه



ههههههه في ظواهر سلبيه كتيره للأسف
بس بالتوعيه ممكن تتغير
والسياحه عندنا مستواها قليل لأن السعر قليل فتجدينها في متناول الطبقات الدنيا لديهم
ومش بيفاصلوا بس ده وجدت الكثير من حالات السرقه
نورتي بتعليقك وتواجدك
في أمان الله