الأربعاء، 23 يوليو 2008

23يوليو 1952






إخواني المدونين والمدونات
كل عام وأنتم بخير
في مثل هذا اليوم من كل عام يطل علي مصرنا الحبيه ذكري في غاية الأهميه
ذكرى يوم كان نقطة تحول في تاريخ ليس مصر فقط
وإنما في تاريخ كل أمتنا العربيه
إنه ذكري ثورة الثالث والعشرون من يوليو سنة 1952
في مثل هذا اليوم حمل مجموعه من ابناء مصر أرواحهم علي أكفهم وقاموا بتلك الثورة المجيده
لإنهاء الحكم الملكي في مصر والتحول للجمهوريه
وليصبح لأول مره في تاريخ مصر من نهاية العصر الفرعوني حتي ذلك اليوم رأس السلطه في مصر في يد مصريين
فقد كون مجموعة من ضباط الجيش المصري تشكيلا سمي بالضباط الأحرار
وكان من أهم عوامل نجاح هذا التنظيم هو الفساد الذي كان مستشريا في القوات المسلحه آنذاك
بالأضافه لحرب فلسطين سنة 1948م والتي كانت بمثابة المسمار الأخير في نعش الملكيه في مصر
وحكم اسرة محمد علي باشا
وقد ظهر جليا خلال هذه الحرب الخيانة الكبرى بتوريد اسلحة فاسده للجيش
كانت السبب الرئيسى وراء الهزيمة المخزيه للجيوش العربيه علي يد مجموعة العصابات الصهيونيه
وقد اظهرت هذه الأسلحه جليا مدي تخاذل السلطه الملكيه في مصر أمام تحكمات القائد الأنجليزي للجيش المصري
لن أدخل في تفاصيل هذه الحرب
وكذلك لن اتحدث عن رأيي في منجزات الثوره
ولكن بلا شك فكما ان لها ايجابيات فقد كان لها ايضا سلبياتها
ومن اهم السلبيات تراجع الديموقراطيه بشكل واضح
وانهيار شبه تام للحياة النيابيه
ولكنها ليست اخطاء الثوره في حد ذاتها ولكنه خطأ التطبيق
ولكني يجب ان أعترف انه يوم مهم في تاريخ مصر والعالم العربي
الم يكن للثوره المصريه الدور الأكبر في دعم استقلال الجزائر والعراق واليمن
وكثير من الأدوار علي المحيط القومي العربي
كذلك انهاء تحكم مجموعة الباشوات في مقدرات البلد
ومجانية التعليم والعلاج و تأميمات معظم رؤوس الأموال المتسلطه داخل مصر
ولكن للأسف الشديد التراجع هذه الأيام في مبادئ الثوره اصبح جليا
سواء علي المستوي القومي او الداخلي
رحم الله الزعيم الخالد جمال عبد الناصر قائد ثورة يوليو
وكل عام ومصر وأهلها وأمتنا العربيه والأسلاميه بخير

هناك 22 تعليقًا:

أميرة يقول...

كل سنة وانت بخير و ربنا يجعل عمرك كله في الخير :)

تعيش و تفتكر .. ولو من المعارضين للكلام ... نروح نشوف الايدي الناعمة باه ولا حدوتة انجي و علي .. كان اسمه ايه الفيلم نسيته :)

كل سنة وانت في احسن حال باذن الرحمن:)

Saudi Romantic يقول...

ألسلام عليكم

ماشاء الله تبارك الله

هذي مناسبه يقدرونها الاشقاء في مصر..

كل عام وانتم بخير

وبلدكم في خير ان شاء الله..

أما بالنسبه لعيد ميلادك أخويه أحمد..

أنا مو من الناس اللي يحتفلون بأعياد

الميلاد..لكن يقول المثل

(( لاجل عين تكرم مدينه ))

وعشان كذا جايب لك هديه بهذي المناسبه

تلقاها على الروابط في الاسفل..

وكل سنه وانت طيب ياابو حميد .

http://up3.m5zn.com/get-7-2008-1eqhf5w43x4.jpg

http://up3.m5zn.com/get-7-2008-txiqvenebcq.jpg

في أمان الله

أميرة يقول...

حد هيعزم عليا بحاجة ولا اخرتها هتفرج وبس :)

ليك اخوات يا احمد هه مش تنسانا باه وقت الحلو :)

هبقي اجيبلك شمعه وانا جاية لزوم التورتة الحلوة دي:)

غير معرف يقول...

أخى الكريم : أحمد
السلام عليكم ورحمة الله وبركاته
أشكرلك هذا الطرح الطيب
أخى: لايستطيع أحد أن ينكر دور الثورة ليس على مصر فقط ولكن على الأمة العربية
سواء كان بالسلب أو بالإيجاب ..

لقد بدأت أخى الثورة بحلم جميل راود المصريين والعرب ولكن مع الأسف ضلت الطريق وانتهت بكابوس مازلنا نعانى من آثاره حتى اليوم ...

وطبعاً الاختلاف فى الرأى لايفسد للود قضية
ولهذا أدعوك للإطلاع على أحدث مقال فى مدونتى وهو يناقش نفس الموضوع ولكن قد تكون بوجهة نظر مختلفة قليلاً
أخوك
محمد الجرايحى

غير معرف يقول...

تحديث ..
أخى أحمد
مبارك عليك عيد ميلادك وكل دعواتى لك بالسعادة والهناءة والصحة
والعمر الطويل لك فى طاعة الله
أخوك
محمد

سبهللة يقول...

كل سنة وانت طيب
لكن بالنسبة للثورة
ماراحت وراحت ايامها
وكل اللى عملته الثورة اتهدت
بعد كانت بتأمم كل حاجة دلوقتى كل اتخصص
وبعد ماكان التموين والتعليم والعلاج مجانى
دلوقتى ادفع والا تموت من الجوع والفقر والجهل والمرض
وعلى رأى الست
وعايزنا نرجع زى زمان
قول للزمان ارجع يا زمان

منه مرتجى - عازفة الأوتار يقول...

اخى العزيز أحمد
ديما مواضيعك جميلة و تصيب بيت القصيد
للأسف الثورة فى رأيى ما اكتملتش
لانه تبعها بطانة مستبدة للحكم فى وقتها
و حالياً الإستبداد بقى علنى
فبشكل او بآخر تبقى الثورة رمز كان هدفا لبعض الظباط الأحرار
و لكن البطانة و إمتدادها لوث هذا الرمز
و أصبح ذكرى جميلة غير مكتملة و هدفاً ما زال قيد التنفيذ


تحياتى للأحرار المخلصين منهم فقط


تسلم ايدك
ننتظر منك المزيد يا احمد

ahmed_k يقول...

اليس

وانتي بالصحه والسلامه
فيلم ايه يا اليس اللي بتتكلمي عليه
انتي بتكتبي التعليق وانتي فاتحه التليفزيون ولا ايه هههههههههه

ربنا ميحرمني من طلتك

دمتي بخييييير
*************************************************

سعودي رومانتك

والله يا صديقي ولا أنا بحتفل بأعياد ميلاد ولا حاجه
بس اهي مجرد تذكر لليوم اللي جيت فيه لهذه الدنيا مش أكتر
والدليل اني شلت الأضافه علشان مغيرش من موضوع البوست لمناسبه شخصيه
وربنا يكرمك علي التورته الجميله اللي بعتهالي
وصلت واتاكلت كمان هههههههه

ودام مرورك نور يا سعودي

آه بجد عايز اسألك سؤال لو مش عايز تجاوب عليه بلاش
أنت معروف بأسم سعودي رومانتك ممكن أعرف اسمك الحقيقي ايه؟

دمت بكل خير عزيزي
****************************************************

اليس

ههههههههههه
بعتلك نايبك حيوصلك علي طوووول
بس جايز الأشاره قافله علشان كده اتأخر بس متقلقيش جايلك في السكه
ومتتعبيش نفسك حناكلها من غير شمع

دمتي بكل خييير
*****************************************************

mhg1962

استاذي محمد الجرايحي
لا يوجد ان شاء الله اي خلاف بيننا
فأنا اتفق معك في طرحك للثوره المصريه
وقد وضحت انها ضلت الطريق ليس لخطأ في فكرتها ولكن في التطبيق
وذكرت انه اليوم بدأ التراجع في مبادئ تلك الثوره في مثلا بيع القطاع العام
وتسلط رجال البزنس علي مقدرات البلد والعمل لمصالحهم وأمثالهم فقط
في حين ان أغلب الشعب يعيش في ظروف لا يعلمها الا الله
ولكنها ذكري لزمن كل ما فيه كان جميلا
وترحما عليه وعلي رجالاته
شكرا استاذي لدعوتك الكريمه وسوف اتجه مباشرة باذن الله لمدونتك
وبالنسبه للتحديث
وانت بالصحه والسلامه
وجزاك الله عني كل خير
دمت بكل ود استاذنا الفاضل

ahmed_k يقول...

سبهلله

وانتي بالصحه والسلامه
ومتفق معاكي في كل ما قلتي
لكنها ذكري لأيام جميله
كانت فيها الكرامه هي الهدف الأسمي لقيادات هذه البلد

شكرا لمرورك الجميل
ودمتي بكل ود
***********************************************

ورود ورياحين

فعلا يا منه الثوره المصريه كان جمالها في الفكره
وكون التطبيق كان غلط ميعيبش الفكره
ولو اني ساعات بقول ايام الملكيه كانت افضل من حيث الحريه والديموقراطيه
وساعات بفتكر الحرس الحديدي واصبح في حيره
التاريخ فيه حقائق كتير مشوهه

عموما مرورك جميل دوما
متحرمش من طلتك
دمتي بكل ود

alwani يقول...

أخوي أحمد

أولاً :جزاك الله خير على كونك أحييت ذكر ...ذكرى تاريخية مهمة بالنسبة للعرب

ثانياً: أنا راح أسجل أمنيتي هنا ربما ويارب تتحقق

((يارب ينتصر الإسلام والمسلمين والمسلمات على أعداء الإسلام))

شكراً كلمة قليلة في حقك ...الله يوفقك

موناليزا يقول...

تعيش وتفتكر

ahmed_k يقول...

ألواني

آمين يا رب العالمين
ربنا يتقبل منكي دعائك
فنحن بحق في حاجة ماسه للدعاء بعدما استشري فينا داء الخلاف الذي ادي لأضعاف أمتنا وإسقاط المهابة منا من قلوب اعدائنا

دمتي بكل خير
****************************************************

موناليزا

أدينا بنحلم بالتاريخ الذي كان مشرقا
لعله يبعث في قلوبنا أملا في الخلاص

مرورك جميل

دمتي بخير

فاتيما يقول...

هوه أكيد زى ما قولت يوم مهم جدا يا أحمد
بس يا ترى إحنا عرفنا نستثمر اليوم دا صح
و لا بوظنا سيرته زى ما بوظنا كل حاجة و شوهناها
أتصور اللى حصل بعد اليوم دا كان مره اكتر من حلوه
الحسنة الوحيدة فيه كانت مجانية التعليم
بس يا ريت فضلت
دلوقتى بقينا بندفع ألالف مؤلفة عشان نعلم أولادنا زى ما التعليم زماااااان قبل الثورة كان للأغنياء فقط ...
غير كدا مفيش حاجة أكتر من اللى كان هيحصل بفعل تقدم الزمن و التاريخ
تحياتى ليك يا أحمد
بس من كتر اللى حاصل من تخلف و مطبات حالية محدش بقى بيفتكر اليوم دا و يحس بيه
يلام و سامحنى عشان مقصرة معاك حبتين

جود الحزن يقول...

الله يعيد كل سنه عليك وانت في اتم الصحه والعافيه....

احترامي

Ehab يقول...

كل سنه وانت والأمه كلها بخير يا ابو الرجال

جميل قوي نفتكر الحاجات اللي اخدناها من الثوره اللي لولاها كان زمان معظمنا ميقدرش يستمتع بالتعليم ولا باي شيء محترم ولا كنا شفنا وظايفنا دي حتى كان زمان واحد زيي مثلا بيشتغل جنايني ولا سفرجي وان كان ليا في الهئ والمئ كان زماني هاشتغل في خماره او كباريه لأن هي دي الحاجه المتاحه للناس العاديه اما الوظائف المحترمه والتعليم العالي وكل ما هو على شاكلته هيكون حكر للباشوات والطبقه العاليا فقط ده بس مجرد جانب من فوائد الثوره معاك حق طبعا كان فيه عيوب وحصل اخطاء كتير لكن لأننا بشر لازم يكون فيه غلطات انما بجد اللي استفدناه اكتر كتير

وانا مش عاجبني اللهجه اللي انتشرت في الفتره الأخيره عن عصر الباشوات كان مش وحش قوي وانهم كانوا ناس طيبين ومحترمين وان الملك كان حنين وغلبان بس هو اتظلم كل ده فكر بينشروه احفاد الباشوات واحفاد المستفيدون وقتها واللي عايزين يرجعوا الأوضاع للماضي وده فعلا في طريقه للحدوث مع التردي اللي بيحصل كل اللي انجزته الثوره بيرموه في اتون الجشع والرأسماليه المستبده اللي كان انهائها والقضاء عليها هو اول مبادء الثوره
رحم الله جمال عبد الناصر
ورحم الله مصر وشعبها المظلوم

وكل سنه وانا طيب
سلااااااااااااااااااااااااااام
اخوك ايهاب

Unknown يقول...

احمد
ازيك يارب تكون بخير
بصراحة انا بحب جمال رحمة الله فهو بحق زعيم قادر على قيادة الامه كلها
بس بحبة وبس على كدة
يعنى الثورة من حتى فى عصرة غيرت كتيرة من اهدافها
جمال كان اسطورة
وخانة حتى اقرب رجالة
كل واحد جرى وراء اطماعه الشخصية

ahmed_k يقول...

فاتيما

منوره مدونتي المتواضعه يا أم يوسف

بس فى حاجات حلوه حصلت غير مجانية التعليم
كتأميم القناه مثلا
وقوانين الأصلاح الزراعي
وحاجات كتيره جدا لم تكن لتحدث لولا قيام الثوره
ولكني اتفق معكي ان اليوم أنتكست كل تلك القيم
فلا مجانية تعليم ولا علاج ولا......الخ
وعودة تسلط رجال الأعمال سواء علي الأقتصاد أو السياسه
ونسأل الله العفو والعافيه

منوره دوما يا فاتيما
ومتغبيش تاني
دمتي بكل ود
************************************************

جود الحزن

وانتي وكل الأمه العربيه بخير وعزه وكرامه

دمتي بكل ود

ahmed_k يقول...

الشنكوتي الكبير

صديقي ايهاب
منورني كلاكيت تاني مره

ههههههه دايما متألق يا هوبه
عارف لو ما قامتش الثوره كان ممكن تتعرف علي واحد باشا ويعرفك بالملك
ويديك الباكاويه
ابسط يا عم انت بيه انت بيه انت بيه
يوم الخميس كان بكره يبقا التلات كان ايه اييييييه ههههههههه

ومتفق معك في كل ما طرحته من ان الزمن بيعود فعلا للخلف

وربنا يستر

دمت بكل ود يا هوووووبه

*****************************************************

نهر الحب
وبحره كمان

أنا كويس والحمد لله
انتي ازيك تمام
ربنا يحفظك دوما

وحب اي انسان لابد وان يكون له اسبابه

فعبد الناصر الله يرحمه كان رجل ذو كاريزما خاصه وله من الهيبه حظ وافر
وكان مصريا وعربيا حتى النخاع
فكره وثوريته بتدل علي كده

لا نألهه ولكنه بشر يخطئ ويصيب
ولكن يكفيه انه حتي رحيله لم يفرط في كرامة شعبه وأمته
رحمه الله رحمة واسعه

تعليقك جميل
دوما كوني هنا

دمتي بكل ود

Empress appy يقول...

طبعا عارف موقفى من هذا وذاك وذلك
ربنا يرحمهم جميعا

ahmed_k يقول...

عارف يا فندم رأيك كويس
وسبحان الله كتباه في بوست كامل

يا أخوانا رأي آبي في الثوره مكتوب في مدونة كوكب آبي للي عايز يشوفه ههههه

منوره دوما

مجرد إطلالك يكفينا

دمتي بكل خير

r يقول...

الثوره اللى حققته انها حولتنا من نظام ملكى محتكر
لنظام جمهورى بردوا محتكر
اهداف الثوره والكلام دا ما اعرف عنه حاجه حصلت اساسا
انا مش ضد الثوره بس مش مع اللى قاموا بيها لان اول حاجه عملوها اختلافهم مع بعض وازى اللى كانوا بينادموا بيه ما مشيوش اساسا عليه
مش عارفه دا تحكم السلطه والكرسى ولا احنا دايما عايزين بطل وصوره ونهتف وراها
انا فعلا بحترم الزعيم جمال عبد الناصر بس احيانا كثيره لما افكر فى نظام الضباط الاحرار كلهم وجمال تحديد بلاقى حاجات كتيره اوى غلط
بتخلى الصوره مش مقبوله
بس بردوا كل سنه ومصر كلها بخير

ahmed_k يقول...

بسنت

وأنتي بالصحه والسلامه

وكلامك كلله صحيح
بس ده ميمنعش ان الثوره حققت إنجازات
لولاها لما تحققت
ليها سلبيات نعم
لكن لها إيجابيات أيضا

سعدت بزيارتك

دمتي بكل خير