الجمعة، 3 أكتوبر 2008

موقف بارد

السلام عليكم ورحمة الله وبركاته

إزيكم يا أصدقائي

اليوم أول لقاء لي معاكم بعد العيد ,

وأتمنى تكونوا كلكم قضيتوا يوم جميل وعيد سعيد عليكم جميعا,

أنا حصلي ظرف طارئ يوم العيد إضطريت على أثره أن أسافر إلى الأقصر

فقد إنتقل إلى رحمة الله فجر ذلك اليوم أحد الشخصيات

اللي تربطنا بيه علاقة وثيقه ,

فسافرنا وقضينا معظم النهار هناك إلى العصر تقريبا ,

وأثناء العوده قابلتني لجنة مرور داخل مدينة قنا

وكنت للأسف مش لابس الحزام ودفعوني غرامه

ورغم الزعل بسبب المخالفه

إلا أني تعرفت على ضابط المرور اللي دفعني المخالفه

وهو رجل برتبة عقيد وفي قمة الزوق والإحترام

ندر وجوده في هذا الزمان ,

فنسيت بسبب أخلاقه العاليه ضيقي بسبب المخالفه

وحمدت الله وتوكلت عليه لأكمل طريقي للغردقه حيث نقيم .

وفي طريق العوده وتحديدا قبل سفاجا ب 50 كم

فوجئت بطابور سيارات أمامي

والطريق ده زي ما كلكم مش عارفين

كثير الملفات والإنحناءات وهو طريق مزدوج

يعني تخطي السياره اللي أمامك بيكون غير متاح بسهوله ,

نرجع للطابور وجدت أنه بسبب أن سيارة شرطه

أمامها سيارة كبيره إعتقدت أنها سياحه

وسيارة الشرطه حراسه ليها ,

والشرطه تغلق الطريق أمام من يحاول تخطيهم

وظلت السياره اللي خلفهم مباشرة كلما جاءت فرصه لتخطيهم

تغلق سيارة الشرطه الطريق أمامها

وأمام أي محاوله لأي سياره تانيه لتخطيهم ,

بشكل مخالف حتى لقواعد سير الحراسه السياحيه

التي تعمل دوما على إخلاء الطريق أمامهم وخلفهم ,

وظللنا مسافة 50 كم نسير بسرعة 70 كم/ساعه

علشان غلاسة ونطاعة سيارة الشرطه ,

وبعد وصولنا سفاجا

فوجئت أن السياره الكبيره التي كانت أمام الشرطه لا صلة لها بها .

فسيارة الشرطه مشيت في ناحيه غير تلك السياره ,

مما يعني أن اللي حصل كان نوع من الغلاسه والبرود ليس إلا

طبعا بغض النظر عن رأيي تجاه الكول السياحي

وما يحصل فيه من تجاوزات لكل كرامة المواطنين

ولكن هذا الموقف كان مستفز لأبعد الحدود ,

وأشك أن السياره كان فيها ضابط بل عساكر وأمناء شرطه

فقط لأن الضابط مهما كان بارد مش حيوصل لتلك المرحله من السفاهه .

دعوني أحلل الموقف ,

لو في إحدي السيارات اللي في الخلف شخص مريض مثلا

كان أيه ممكن يجراله ؟؟

ولو شخص مرتبط بميعاد مهم قد يأثر عليه عدم اللحاق بيه ,

ماذا كان موقفه ونتيجة فعلتهم عليه ؟؟

المطلوب أولا عمل دورات

وخصوصا لأمناء الشرطه على كيفية وأسلوب التعامل مع الناس

لأن مثل تلك التصرفات غير المسئوله

بتزيد من الحنق تجاه كل جهاز الشرطه ,

ثانيا معاقبة رجال الشرطه المستفزين العقاب الرادع

لكي لا تتكرر تلك الأفعال المثيره ,

مش خصم يوم أو يومين

لأ عقاب يساوي فعلتهم

ليرتدع من تسول له نفسه الإقدام لمثل تلك الأفعال ,

وأنا صورت بالموبايل جزء من الموقف

فأسيبكم تشوفوا البرود بأسمى أشكاله

هناك 44 تعليقًا:

كـــيــــــــارا يقول...

ايه الشلل ده

والله بجد موقف يحرق الدم

معلش بقي يااحمد

رئيس جمهوريه نفسى يقول...

اولا البقاء للة فى الفقيد
ثانيا: موضوع الفوج عموما ربنا يرحمنا برحمته وبعد ما كانوا بيعملوا طريق طيبة القصير بملايين شركات السياحة رفضت وقرفينا فى عيشتنا
ثالثا: حتى لو عربية الشرطه فاضية هيبة العربية من هيبية بدجها ده شعار فى مصر والشعب يولع ولا هيبة البدج يروح

صباح الصباح يقول...

ماهو انتا قلت بنفسك يبو حميد

امناء شرطة

دى اقل حاجة عندهم!!!

هوة انتا ما شفتش فيلم (هى فوضى)؟؟

علي محـمــــــد يقول...

ألسلام عليكم

أولاً عظم الله اجركم في فقيدكم وربنا يرحمه ويصبر اهله .

ثانياً شوقتني لقيادة السياره في طريق سفاجه الغردقه والغردقه القاهره .. بس بصراحه أنا من هواة القياده في هذي الطرق بسرعات عاليه مش سرعة 70 :( أصل اخوك يستمتع في القياده على الطرق المزدوجه :) مع انها أعلى خطوره .. بالنسبه لسيارة الشره اتوقع انه يحاول حجز السيارات عشان ما يتجاوزو سرعة السبعين لان السرعه المسموح بها في الطرق المزدوجه في اي مكان في العالم تكون من 70 الى 90 على احسن الأحوال اما الطرق السريعه تكون السرعه القصوى فيها على 120 كحد اعلى وهذا كمان في العالم كله :) وهنا يتأكد ان سيارة الشرطه بتطبق القانون بشكل صحيح ( لاتزعل ) هذا رأيي :) ..لكن ما اخفيك اني تعاطفت معاك في هذا الحجز في الطريق ^_*

مشكور على المشوار اللي عيشتني فيه ذكريات حلوه كانت خاليه من اي حجز من سيارات الشرطه على سرعتي ^_^

في امان الله

بنت سيناء.. يقول...

دة مش برود
دى بلطجة يا اخ احمد
اكيد ليهم علاقة ببعض وانت مش عارف هو يعنى لازم يكونو مع بعض للاخر؟؟
انما واجب اقولك لك البقاء لله فى متوفيك
الله يرحمنا جميعا

shimaa يقول...

السلطة بقت فى بلدنا ليها هيبة ودايما الناس حاسه ان الانسان المسئول ده فوق القانون مع ان العكس هو اللى صح

اى عسكرى دلوقتى بقى حاسس انه فوق البشر

وتلاقى اللى جوه العربية واخدنها لعبة وبيضحكوا ويحكوا الموقف ده لحد ما يموتوا

ربنا يرحمنا
كان الله فى عونك

سراج يقول...

أعظم الله لكم الأجر في فقيدكم
يقال أن الدنيا إن خليت من الأخيار قلبت أخشى أن يستبدل الأخيار بـ(الأشرار).. الحمد لله على سلامة الوصول.

kochia يقول...

اولا البقاء لله
وغفر الله لموتانا وغفر لنا ان شاء الله
وفعلا انت اخترت العنوان الصح
موقف بارد
فيه بعض رجال الشرطة سواء ضباط او امناء شرطة او عساكر .. الكثير منهم - وليس الكل .. يعتقدون انهم من فئة غير البشر من حقهم يهزروا ببرود ويتصرفوا بعنجهية وعدم احترام .. ولست ادري ما هي ميزتهم الكبري في ذلك
ساعات بحس اننا في ملكية وهم ذو الدماء الزرقاء
ونحن ذوي الدم الاحمر الارضي الرخيص
عفي الله عنا
وغفر لنا

الحكمة ضالة المؤمن يقول...

اولا كل عام وانت بخير
المصيبة الكبيرةان الشرطه عندنا في العالم العربي
تحسب نفسها الحكومة
فالشرطي هو من يسن قانونه لنفسه ويطبقه واذا كان صاحب رتبه طبقه على الي تحته
لعدم وجود الرقيب والحسيب
فالضابط الي خالفك لعدم ربط الحزام كان محق بالمخالفة ومع ذلك رضيت عن اخلاقه لتطبيقه القانون
لكن ذاك الي بالسياره ليس بارد بل تكرم وبعيد عنك حيوان
لا يسبب الاحتقان على الشرطه فقط بل يتسبب بلاحتقان على البلد نفسها
للاسف هم لا يحتاجون لدورات تثقيفيه
انما يحتاجون لغربله كامله
تحياتي
وكل من زار مدونتك بخير

أمل حمدي يقول...

اخي احمد
البقاء لله
وربنا يعوض عليك في المخالفة
اما الباقي ها اقولك ايه
يمهل ولا يهمل
كل سنة وانت طيب وعيد سعيد

رحيـــــــــــــــــــــــل يقول...

اول شي

عظم الله اجركم

وبعدين انا حسيت عم بفرا مغامره والله

بس كتير حلو المشوار معنه في اشياء

بضايق بس حل الواحد بتعلم

من اغلاطته

تحياتي

رحيل

أختكم فى الله يقول...

الله يكون فى عونك

معلش حصل خير

حضرتك فى مصر فده شئ عادى

راعى الناقه يقول...

كل عام وانت طيب يا احمد
واعظم الله اجرك
وهذه احوال الدنا
وبعدين رجال الشرطه من كتر مهم عايشين مع البلطجيه فهم بقوا البط من البلطجيه نفسهم الا من رحم ربك
وربنا يوليها الصالح
عارف الموقف دا لو عندنا كان الواحد طلع البندقيه وضرب عليهم نار هيوسعوا رغم انفهم
تقبل زيارتي

احمد الشاعر يقول...

رغم ما أنتابني من ضغينه وأنا أقرأ الموضوع

إلا أنني سريعا ما تذكرت أنك يا عم أحمد في أسبارطه المحروسة

حمدا لله على السلامه..وربنا ينتعنا بالسلامه

صبرني يارب يقول...

البقاء لله يا استاذنا

والى شوفته عادي

اذا كان رب البيت بالدف ضارب

يعنى عايز منهم ايه ما شايفين الى اكبر منهم بيعملوا كده وامر من كده

ربنا يرحمنا منهم

الريم يقول...

أحمد البقاء لله اولا ثانيا حاجة مستفزة فعلا

انا اكتر حاجة تستفزنى السواقة ببطء خصوصا فى طرق السفر وكل مرة اسافر فيها لازم اتمسك ردار مش قادرة افهم ازاى يخلوا الواحد يتحكم فى سرعة 90 مع ان العربيات الزيرو كلها واللى ملية لبلد سرعتها فظيعة بجد ناس بتستعبط متهيالى انهم عايزين يلموا فلوس وخلاص
خصوصا بعد قانون المرور الجديد

واحدة صاحبتى لسهواقعة فى حفرة فى وسط شارع حيوى جدا بس للاسف

الشارع مظلم تماما ده غير انهم كان بيحفروا وسابوا الحاجة زى ما هية ومشيوا

تخيل التسيب طبعا المقص اتكسر مع ان عربيتها زيرو ومشالله عليها

واولادها اتخضوا وهى خافت موت

ان نفسى اعرف الفلوس ديه بيعملوا بيها ايه

احمد ارقى شوارع القاهرة مليانة مطبات وحفر

واعمدة الانارة مش بتنور

يالا حمدلله على السلامة

PrInCeSS BeRy يقول...

احمد ازيك كل سنة وانت طيب عيد سعيد

لا حول ولا قوة الا بالله ومفيش غير حسبنا الله ننعم الوكيل ربنا يصبرك بجد

nona يقول...

اولا البقاء لله و عظم الله اجرك
ثانيا احنا فى بلدنا الاى هى بلدك اى حد يقرب من بعيد او قريب او حتى امين شرطة بيتصرف اكنة رئيس الجمهورية
و مش بيهم اى حد ما تعرفش دية بلطجة و الا عقد نقص و بيطلعها على الناس و الا اية بالضبط
حسبى الله و نعم الوكيل
صحيح نستنى
كل سنة و حضرتك طيب

ابوعبدالعزيز الكثيري يقول...

اخي الودود / احمد

السلام عليكم

احسن الله عزاءكم في فقيدكم ..

وبعدين ليه العجلة يا عم .. تمتع بمناظر الجبال في الطريق ..!

الحمد لله اك وصلت بالسلامة

محمد فاروق الشاذلى يقول...

رحم الله الفقيد وتقبله وتجاوز عنه.
أما عن سيارة الشرطة فلا تعليق

Unknown يقول...

اولا عظم الله اجركم في مصابكم
ثانيا
كل عام وانت بخير
وتقبل الله منكم صالح الاعمال

Unknown يقول...

احمد
ازيك كل سنة وانت طيب
يااحمد المواقف دى متكررة بشكل كبي ومبالغ فية اوحيانا ابطالها كمان بيكونوا ضباط شرطة يعنى متندهش ابدا
كلنا فى خدمة الشرطة واهلهم وذويهم

انسى ياعم

احمد قطب يقول...

أخى الفاضل أحمد

البقاء لله

أما بالنسبه للشرطه فده شئ متوقع منهم
لان كل واحد بيستغل منصبه غلط لو كل واحد أتقى الله

فى عمله كانت الناس هتعيش فى أمان
دول عملو معاك أنت كده مابالك الى عملوه مع الشعب يوم العيد


ياريت لو تزور مدونتى وتشوف الى هعما عملوه فى الشعب

ahmed_k يقول...

كيارا


إزيك منوره
وفعلا موقف حرق دمي

بس الحمد لله مشاطش

تقبلي تحياتي
**********************************************
رئيس جمهورية نفسي


عظم الله أجركم
طريق طيبه الجديد أنا مشيت فيه
تكلفه عالفاضي بس فايده لبتوع المحاجر
طويل جدا بدون أي خدمات وموحش للغايه
والشرطه ليس كلهم بهذا السفه فأنا أعرف منهم أشخاص قمه في الأخلاق
ولكن زي ما قلت قيمة العربيه من قيمة البدج

تقبل تحياتي
*******************************************
صباح الصباح


لا والله يا محمد يا خويا
هو أيه حصل في الفيلم
وأمناء ومعندهمش امانه ههههههه

منور يا صديقي
*********************************************
علي محمد


سبحان من له الدوام
السرعت في هذا الطريق بالفعل 90كم/س
ولكننا كنا ماشين 70 وده الشلل بعينه
حتى 90 بتصبح ضئيله جدا في بعض الطرق
يعنى لو كانت 110 تبقى تمام
أنا مش من هواة السرعات العاليه
بس مش لدرجة 70كم/س
وسيارة الشرطه كانت بتغلس مش أكتر

وسعيد إني رجعتلك زكريات حلوه
ربنا يديم عليك الأيام الحلوه
وإنت كنت مكلمني وأنا رايح
ولو كلمتني وأنا راجع كنت وصفتلك المشهد عالهواء مباشرة هههههه

دمت في رعاية الله
*********************************************
بنت سيناء


عظم الله أجرك
لأ هما فعلا مكانوش مع بعض
لأن العربيه طلعت جمرك وكملت الطريق للغردقه
وهما دخلوا سفاجا
منوره دايما يا بنت سيناء

دمتي بكل خير

ahmed_k يقول...

شيماء طلعت


آه فعلا هما الظاهر كانوا بيلعبوا
لو في رمضان كنت قولت بيسلوا صيامهم
لكن رمضان خلص يبقى بيستهبلوا

منوره يا شيماء
في حفظ الله
********************************************
سراج


عظم الله أجركم
وفعلا كلامك حقيقي وصادق

نسأل الله العفو والعافيه

في حفظ الله
***********************************************
كوشيا


سبحان من له الدوام
وصدقتي فيما قلتي
ولكن المقوله تقول
من أنفسكم سلط عليكم
لأنهم من الشعب وللأسف الكثير من لو تسلط في أي موقع ظلم وتجبر
ولكن الله مطلع علينا وهو أعلم بالسرائر

دمتي بحفظ الله
*********************************************
الحكمه ضالة المؤمن


وأنت بالصحه والسلامه
فعلا هم كما قلت يحتاجون لغربله كامله
وهي أحسن وسيله لعلاج هذه الظاهره
أشكر مرورك أخي الكريم

دمت برعاية الله
************************************************
ماما أموله


سبحان من له الدوام
وحيجيلهم يوم يسيبوا الخدمه وياخدوا بالبرطوش ههههههههههه
منوراني دايما

في أمان الله
**************************************************
رحيل


البقاء لله
فعلا هي مغامره
ومغامره عالطريق السريع
اللي فجأه أصبح بطيئ هههههه

منوره يا رحيل
في أمان الله

ahmed_k يقول...

أختكم في الله


هههه فعلا شيئ عادي
بس مش عادي 70كم/س
دي مشيه تنقط
منوره يا أسماء
دمتي في حفظ الله
********************************************
راعي الناقه


وإنت بالصحه والسلامه
وسبحان من له الدوام
آمين ربنا يوليها الصالح
لأن الكيل زاد وفاض

هههههه وبندقية أيه يا صديقي
إنت الظاهر عايزهم يعتقلوني هههههه

وبصراحه مكنتش عامل حسابي ومأشترتش بندقيه من أساسه

منورنا والله
وتقبل تحياتي
*********************************************
أحمد الشاعر


آمين
بس شكلها الولاده متعسره حبتين

منور يابوحميد
تقبل تحياتي
***********************************************
صبرني يا رب


سبحان من له الدوام
فعلا مفيش خير لافي الكبير
ولا في الصغير

منوره يا أم مريم
دمتي بخير

ahmed_k يقول...

الريم


معاكي حق ياريم
هي السرعه كانت في الأول 100كم/س
ولما لقوا الناس ملتزمه بيها نزلوها ل90كم/س علشان اللى مبيغلطش حيغلط غصب عنه
وقلبي مع صديقتك
بس وقوعها في حفره أدي لكسر المقصات فقط فدي رحمه من ربنا
وإلا حركه زي كده ممكن تدمر العفشه الاماميه بالكامل
ومتحكليش عالمطبات ده أنا بعاني من القصه دي أوي

سلمتيلي على أسكندريه ولا لأ
منوره يا ريم

دمتي في حفظ الله
*******************************************
برنسيسه عبير


وإنتي بالصحه والسلامه
وفعلا موقف يستحقش غير الحسبنه

منوره يا عبير ومتغبيش تاني

تقبلي تحياتي
***********************************************
نونا


سبحان من له الدوام
وإنتي بالصحه والسلامه
وهي زي ما قلتي عقد نقص
لأن منهم أبن الناس مبيعملش الحركات دي

منوره دايما
تقبلي تحياتي
********************************************
بسام الكثيري


إزيك يا اخي الحبيب
وعظم الله أجرك
ومش إستعجال ولا حاجه
بس سرعة 70 ممله جدا
وبالنسبه للجبال انا من كتر سفري على هذا الطريق حفظتها
وأنا كنت تعبان من الوقفه طوووول النهار في الشمس
فمفيش كزاج للفرجه خالص هههههه

منور يا صديقي الغالي

دمت برعاية الله
***********************************************
قلب مصري


عظم الله أجرك يا صديقي
ومنورني بوجودك دايما

تقبل تحياتي

ahmed_k يقول...

الكلداري


سبحان من له الدوام
وكل عام وأنتم بخير

تقبل مني خالص الموده
*********************************************
نهر الحب


وإنتي بالصحه والسلامه
وفعلا المواقف دي متكرره بس
أنا مصادفتش برود بالشكل ده قبل كده

وحاضر إعتبريني نسيت خلاص هههههههه

منوره يا إيناس كعادتك دايما
في رعاية الله
**********************************************
ملك المدينه


سبحان من له الدوام
وفي فعلا منهم نماذج سيئه
ومنهم النماذج السيئه

وحاضر رايحلك حالا

تقبل خالص تحياتي

عاشقة القمر يقول...

اولا البقاء لله و عظم الله اجرك
ايها الشهر ترفق دمع الحبين تدفق
قلوبهم من الفراق تشقق
عسي توبه تصلح ماتمزق
عسي عسي متقطع عن ركب
المقبولين يلحق
عسي أسير الأوزار يطلق
عسي مستوجب النار
ببركه هذا الشهر يعتقق وعسانا الرضا الله وقبوله نوفق
كل عام انتم بخير

Unknown يقول...

أخى الكريم : أحمد
السلام عليكم ورحمة الله وبركاته
البقاء لله ونسأل الله تعالى أن يجعل مسواه الجنة...
أخى مثل هذه المواقف تحدث كثيراً ورغم أنهم مفترض أنهم قدوة والمنوط بهم حفظ النظام
لكن ماذا نقول وقد ترك لهم الحبل على الغارب فأصبحوا فوق رقاب العباد متسلطين
حسبنا الله ونعم الوكيل

مـجـنـووون يقول...

البقاء لله

*****************

مصر دلوقتي بقت للشرطة بس . دلوقتي المخبر بيعمل إلي عيزه ومحدش بيقدر يكلمه

الشرطة مش فالحه غير علي الناس الغلابه بس ، والناس الكبيرة بتخاف تقرب منها

*****************
منهم لله وحسبي الله ونعمه الوكيل

والله دمي بينحرق لما بسمع الحاجات دي

تقبل مروري
مجنووون

غير معرف يقول...

بجد حسبى الله و نعم الوكيل
هو غيه الشلل ده
ربنا يتولا كل عبيده برحمته

مهرة سالم يقول...

أخي أحمد...
انا معك بأنه يجد أن يخضع كل ن يعمل في الشرطه لدورات تدريبيه وتأهيليه...
لتجنب مثل هذه المواقف...
دمت بخير

موناليزا يقول...

حسبى الله ونعم الوكيل
ومن هذا الموقف تظهر عقدة النقص التى يتمتع بها الكثيرين

Mony يقول...

اولا


البقاء لله



ثانيا


معلش

و في قول "لو علمتم الغيب لاخترتم الواقع"


و "عسي ان تكرهوا شيئا و هو خير لكم"

الله اعلم كان ممكن يحصل ايه


كل سنة و حضرتك طيب

غير معرف يقول...

::::::::::::::::::::::::::::

حسن الله عزاءكم في فقيدكم ..

:
كان الله في عونك .. اذا كانت الشرطة من يفعل ذلك .. !!
لا نقول غير كان الله في عونكم ..

والأمر جدا ممل ومـ سبب لرفع الضغط إذا كانت القيادة في مثل هذا الطريق بسرعة 70 وأقل ..
ولكن نقول عسى أن يكون خير ..
ولا بد من سلطه وموقف يوقف مثل هذه الأمور ..
:
والحمد الله على سلامتكم ..
:
حفظك الله ..

::::::::::::::::::::::::::::

Empress appy يقول...

لو انا هحاول اروح جنبهم وانبهم للقصه دى وتتقلب خناقه عادى علشان العساكر باردين ومعندههمش دم وخاصه الفرد اللى هو الامين بجد
حاجه زباله فعلا والله يا امد فى كل التصرفات
الظابط استحاله يعمل كده دول التانين اللى حاسين بنقص شوف ده لو راكب معاه الظابط كان مشى عدل
معلش كل سنه وانت طيب وافترك الحزام انا بربطه قبل ما ادور العربيه

سمكه واحده يقول...

اولا طبعا البقاء الله

ثانيا دي اول زياره ليا وان شاء الله مش هتكون الاخيره بس بقي تستحملوني

ثالثا اللي ضيقني في الموقف الصوت هل ده صوت الهوي وصوت العربيه والصمت الرهيب ولا البحر متهيقلي دي صحراء وعربيه ماشيه انا زهقت وانا مكاني علي الكمبيوتر من الصوت هههههه
طبعا بهزر
طبعا كلنا عارفين غلاسه الشرطه والظباط وقليل منهم المحترم مع احترامي لكل ظابط يحترم نفسه خاصا في مصر
تحياتي

Ahmed Mohamed يقول...

ياسيدي من بعض ما عندهم

وبعدين تشك حضرتك ليه في ان الي جوه العربيه ده مش ظابط
دا الي علم امناء وعساكر الشرطه البرود والنطاعه والسماجه وقلة الذوق
هما الظباط ذات نفسهم ال يافرعون ليه اتفرعنت قال ملقتش حد يلمني

دمتم بود

جود الحزن يقول...

اولا كل عام وانت بخير ياحمد...

وعظم الله اجر اهل الفقيد...

احترامي لك

ahmed_k يقول...

عاشقة القمر


سبحان من له الدوام
وحضرتك بالصحه والسلامه
وأشكرك جزيل الشكر
على تلك الكلمات الجميله
في وداع شهرنا الكريم

دمتي بكل خير
**********************************************
محمد الجرايحي


عظم الله أجرك وتقبل منك الدعاء
وصدقت أخي الكريم
نسأل الله لهم الهدايه فهم منا ونحن منهم

دمت بكل خير
**********************************************
مجنووون


للأسف أتى علينا الزمن الذي
حذرنا منه نبينا عليه الصلاة والسلام
بأنه إذا سرق فيهم الشريف تركوه
وإذا سرق الفقير أقيم عليه الحد
نسأل الله العفو

دمت بكل خير
***********************************************
أنا ودماغي


هههههههههههه
والله معاكي حق
هو كان موقف يشل بصحيح

تقبلي خالص تحياتي
***********************************************
m.k


بارك الله فيكي على المرور الطيب
ولعل ندانا يجد من يجيب
ولكني لا أعتقد

دمتي بكل خير
**********************************************
موناليزا


نقص وتفاهه كمان
ربنا يفرجها من عنده

دمتي بكل خير

ahmed_k يقول...

mony


سبحان من له الدوام
وحضرتك بالصحه والسلامه

والحمد لله على كل حال
دمتي بكل خير
**********************************************
الوجد


عظم الله اجركي
وفعلا هي سيارة شرطه
بس كانوا بيورونا خفة الدم
في وقت فراغهم ههههههه
ربنا يصلح الحال

دمتي بكل خير
**********************************************
appy


أنا كان من الصعب أقرب منهم لأن الطريق مزدوج وفي عربيتين بيني وبينهم
فكنت حتزنق
ولأن الطريق ملفاته كتير
فمكنتش حشوف السياره المقابله إلا وقد قربت مني
وبطلت خالص امشي من غير حزام

دمتي بكل خير
*********************************************
سمكه وحده


سبحان من له الدوام
حضرتك منوره في أول زياره
وياريت تنوريني دايما

ههههههههه هو فعلا كانت 50كم كئيبه
وكنا تعبانين من الوقوف في الشمس طول النهار فكنت فاتح الشباك علشان الهوا يفوقني بس دي كل الحكايه
وفي في الظباط الكثير من أولاد الناس
ودولا محترمين جدا وأنا أعرف الكثير منهم
بس أنا الموقف ده غاظني أوي

شكرا لمرورك اول مره وفي إنتظارك دوما

تحياتي
***********************************************
أحمد علام


ههههههه منور يابوحميد
أنا بعتقد أنهم ممعمش ظابط
علشان مشيتهم كانت فيها خطر عليهم
قبل أي حد
ولو ظابط معاهم مكانش حيخليهم يمشوا بالشكل الغبي ده

دمت بكل خير
***********************************************
جود الحزن


وإنتي بالصحه والسلامه يا جود

وعظم الله اجرك

ومش ناويه تغيري الإسم لجود الفرح
كفايه حزن لحد كده

دمتي بكل خير

خالد الكومي يقول...

بصراحة مجهود مميز ورائع مبروك لك جداااااا
بس لي سؤال
من الذي وضع الكرسي اسفل المنصة؟؟؟؟

ahmed_k يقول...

أبن الناس الطيبين


أهلا وسهلا بك يا هندسه
ومرحبا بك في أولى زياراتك
والتي ارجو أن لا تكون الأخيره
وبالنسبه لسؤالك فهو متعلق ببوست
ذكرى الإغتيال السياسي الأكبر في مصر
وهذا الكرسي طان يستخدمه أحد أفراد الحرس الخاص بالرئيس وهو قناص محترف
ولكن لنفاذ إرادة الله امره الرئيس بأن يجلس في خلفه لوجود اعداد غفيره من الناس خلف الرئيس

نورتني أخي العزيز
دمت بكل خير